इरानमाथि आक्रमण नगर्ने ट्रम्पको भनाइपछि विश्व बजारमा तेलको मूल्य घट्यो

अमेरिकी राष्ट्रपति डोनाल्ड ट्रम्पले नोभेम्बरमा हुने मध्यावधि निर्वाचनअघि इरानमाथि आक्रमण नगर्ने बताउनुभएपछि अन्तर्राष्ट्रिय बजारमा कच्चा तेलको मूल्य घटेको छ। समाचार संस्था रोयटर्सका अनुसार शुक्रबार दिउँसोसम्म कच्चा तेल प्रतिब्यारेल करिब १ डलर १० सेन्ट अर्थात् करिब १.१ प्रतिशतले सस्तिएर करिब १०३ डलर १८ सेन्टमा झरेको थियो। रोयटर्सकै अनुसार अमेरिकी वेस्ट टेक्सास इन्टरमिडिएट तेलको मूल्य पनि करिब ४९ सेन्ट अर्थात् करिब ०.५ प्रतिशतले झरेर करिब ९१ डलर पुगेको थियो।

बिहीबारको कारोबारमा उकालो लागेको मूल्य शुक्रबार ट्रम्पको अभिव्यक्तिपछि ओरालो लागेको हो। मध्यपूर्वमा युद्ध सुरु भएदेखि इरानले हर्मुज जलमार्गमा नाकाबन्दी लगाउने प्रयास गर्दै आएको छ। शुक्रबार नै इरानको रिभोलुसनरी गार्ड्सले उक्त जलमार्गमा एउटा ट्याङ्करमाथि प्रहार गरेको दाबी गरेको छ।

नेपाल राष्ट्र बैंकले आजका लागि १ अमेरिकी डलरको खरिद दर १५४ रुपैयाँ ५६ पैसा र बिक्री दर १५५ रुपैयाँ १६ पैसा तोकेको छ। यस बिक्री दरमा हिसाब गर्दा प्रतिब्यारेल कच्चा तेलको मूल्य करिब १६ हजार रुपैयाँ पर्छ। वेस्ट टेक्सास इन्टरमिडिएट तेलको एक ब्यारेल भने करिब १४ हजार १ सय रुपैयाँ बराबर हुन्छ।