हर्मुजमा अवैध मार्गबाट जान खोजेको ट्याङ्करमाथि प्रहार गरेको इरानको दाबी

इरानको रिभोलुसनरी गार्ड्सले हर्मुज जलमार्गमा आफूले 'अवैध मार्ग' भनेको बाटोबाट पार हुन खोजेको एउटा इन्धन ट्याङ्करमाथि शुक्रबार प्रहार गरेको दाबी गरेको छ। सरकारी सञ्चारमाध्यममा सार्वजनिक विज्ञप्तिअनुसार 'न्याटविट' स्वामित्वको एनभी सनशाइन नामको विशाल ट्याङ्कर जलमार्गको दक्षिणी भागबाट जाँदै थियो। विज्ञप्तिमा इरानी सेनाले जलमार्गलाई पूर्ण नियन्त्रणमा लिएको दाबी गरिएको छ।

समुद्री जहाज अनुगमन गर्ने निकायहरूले पनि शुक्रबार संयुक्त अरब इमिरेट्सको तटभन्दा पर एउटा जहाजमा अज्ञात क्षेप्यास्त्रले हानेको जानकारी दिएका छन्। तर उनीहरूले उल्लेख गरेको जहाजको नाम इरानको विवरणसँग मेल खाँदैन। मध्यपूर्वमा युद्ध सुरु भएदेखि इरानले यो जलमार्गमा नाकाबन्दी लगाउने प्रयास गर्दै आएको छ।

जहाजहरूले आफूले तोकेको मार्ग प्रयोग गर्न अनुमति लिनुपर्ने इरानको अडान छ, तर धेरै जहाज जलमार्गको दक्षिणी भागबाट जान थालेका छन्।