ककरोच पार्टीको प्रदर्शनअघि नयाँ दिल्लीमा इन्टरनेट बन्द, सुरक्षा कडा

भारतको ककरोच जनता पार्टीले शनिबार नयाँ दिल्लीमा गर्ने भनेको प्रदर्शनअघि केन्द्रीय गृह मन्त्रालयले राजधानीको केही क्षेत्रमा इन्टरनेट सेवा रोक्ने निर्णय गरेको छ। मन्त्रालयको आदेशअनुसार जनपथ र कर्तव्य पथ जोडिने चोक वरिपरिको करिब ४ किलोमिटर क्षेत्रमा आज राति १० बजेदेखि भोलि राति १० बजेसम्म इन्टरनेट बन्द रहनेछ। यसअघि नै दिल्ली मेट्रोका करिब ५७ स्टेसन बन्द गर्ने र दर्जनौँ रेल रद्द गर्ने निर्णय भएको छ।

प्रदर्शनअघि राजधानीमा २० हजारभन्दा बढी प्रहरी र अर्धसैनिक सुरक्षाकर्मी खटाइएका छन्। मतदाता नामावलीको विशेष पुनरावलोकनमा अनियमितता भएको आरोप लगाउँदै पार्टीले मुख्य निर्वाचन आयुक्त ज्ञानेश कुमारको राजीनामा माग गरेको छ। निर्वाचन आयोगले भने दोहोरो नाम भएका र अयोग्य मतदाता हटाउन यो प्रक्रिया चलाइएको जनाएको छ।

दिल्ली प्रहरीले जन्तरमन्तरमा प्रदर्शन गर्न अनुमति दिएको छैन। पार्टीका सहसंयोजक सौरभ दासले सामाजिक सञ्जाल एक्समा भारत सरकार नै लकडाउनमा रहेको टिप्पणी गर्नुभएको छ। संस्थापक अभिजित दीपकेले आफू पक्राउ परे पनि समर्थकहरू मागमा अडिग रहँदै शान्तिपूर्ण रूपमा सहभागी हुन आग्रह गर्नुभएको छ।

अर्का सहसंयोजक आशुतोष रांकाले यो आन्दोलनबाट इतिहास रचिने दाबी गर्नुभएको छ।