आइतबारदेखि उपत्यकाका ६ स्थानमा जुनसुकै कम्पनीको ग्यास सिलिन्डर साट्न पाइने

काठमाडौँ उपत्यकाका ६ स्थानबाट असोज २५ गते आइतबारदेखि फरक कम्पनीका ग्यास सिलिन्डर साटफेर गर्न सकिने भएको छ। यो व्यवस्था नेपाल एलपी ग्यास उद्योग सङ्घले मिलाएको छ, जसमा नेपाल आयल निगमले समन्वय र ग्यास बिक्रेता महासङ्घले सहकार्य गरेका छन्। असोज ३१ गते शनिबारसम्म दैनिक बिहान ९:३० देखि अपराह्न ४:३० बजेसम्म सेवा उपलब्ध हुनेछ।

एभरेस्ट र सुगमका लागि सिफलचौर, सगरका लागि पेप्सीकोला र नेपाल, एचपी, गीता, राजधानी तथा त्रिवेणीका लागि बालाजु औद्योगिक क्षेत्रको गेट तोकिएको छ। बाबा र श्रीका लागि सुकेधारा, साइबाबा र श्रीकृष्णका लागि कलङ्की तथा श्रीराम ग्यासका लागि ललितपुरको हरिसिद्धि तोकिएको छ। साटफेर गर्दा अतिरिक्त शुल्क लाग्दैन, तर भरिएको सिलिन्डरको तोकिएको मूल्य भने तिर्नुपर्नेछ।

दुरुपयोग रोक्न एक जना उपभोक्तालाई एउटा मात्र सिलिन्डर साट्न दिइनेछ र उनीहरूको पहिचान तथा मोबाइल नम्बर अभिलेखमा राखिनेछ। बजारमा करिब ५८ कम्पनीका सिलिन्डर चलनमा रहेकाले साटफेरमा सहज बनाउन यो व्यवस्था गरिएको सङ्घले जनाएको छ। भारतका रिफाइनरीबाट आयात सहज भइरहेको र भदौमा मात्र करिब ४२ लाख सिलिन्डर बिक्री भएको सङ्घले जनाएको छ।