नेप्से दोहोरो अंकले उकालो, सबै उपसमूह हरियो

सेयर बजार परिसूचक नेप्से साताको अन्तिम कारोबार दिन शुक्रबार दोहोरो अंकले बढेको छ। नेपाल स्टक एक्सचेञ्जका अनुसार नेप्से करिब १७ अंकको वृद्धिसँगै झन्डै २ हजार ५९२ बिन्दुमा पुगेको छ। ठूला कम्पनीको कारोबार मापन गर्ने सेन्सेटिभ परिसूचक करिब ४ अंक बढेर झन्डै ४६६ बिन्दुमा पुगेको छ।

फ्लोट र सेन्सेटिभ फ्लोट सूचक पनि करिब डेढ अंकका दरले उकालो लागेका छन्। बजारका सबै उपसमूहका सूचक बढेका छन्, जसमा बैंक समूह करिब सवा १ प्रतिशतले उक्लिएको छ। शुक्रबार करिब १ करोड २९ लाख कित्ता सेयर झन्डै ४ अर्ब ८३ करोड रुपैयाँमा किनबेच भएको छ।

अघिल्लो दिन बिहीबार कारोबार रकम ४ अर्ब रुपैयाँभन्दा कम थियो भने नेप्से करिब २ अंक मात्र बढेको थियो। आज मूल्य बढ्ने कम्पनीको सङ्ख्या घट्ने कम्पनीको तुलनामा करिब दोब्बर छ। केही कम्पनीको मूल्य भने स्थिर रहेको छ।

कुथेली बुखरी स्मल हाइड्रोपावर, सिन्धु विकास बैंक र सोलु हाइड्रोपावरका लगानीकर्ता लाभमा रहेका छन्। कुथेली बुखरीको सेयर मूल्य झन्डै ५ प्रतिशतले बढेको छ। बजार उकालो लागेको दिन पनि रिज लाइन इनर्जीको सेयर करिब ८ प्रतिशतले घटेको छ।