एआईलाई ‘सुपर इन्टेलिजेन्स’ भन्ने अमेरिकी निर्णयको चीनद्वारा सम्मान

चीनले अमेरिकी प्रशासनले आर्टिफिसियल इन्टेलिजेन्सलाई सुपर इन्टेलिजेन्स, अर्थात् एसआई भन्ने निर्णयको सम्मान गर्ने जनाएको छ। चिनियाँ विदेश मन्त्रालयले शनिबार विज्ञप्ति जारी गर्दै अमेरिकाले रोजेको शब्दावलीको सम्मान गर्ने उल्लेख गरेको छ। राष्ट्रपति डोनाल्ड ट्रम्पले मङ्गलबारदेखि अमेरिकी सरकारका औपचारिक सूचना र वक्तव्यमा पुरानो शब्दको ठाउँमा सुपर इन्टेलिजेन्स लेखिने घोषणा गर्नुभएको थियो।

यसै साता वासिङ्टनमा भएको ट्रम्प र चिनियाँ राष्ट्रपति सी जिनपिङबीचको शिखर वार्तामा कृत्रिम बुद्धिमत्ता प्रमुख कार्यसूचीमा थियो। वार्तापछि ट्रम्पले सामाजिक सञ्जालमा राष्ट्रपति सीलाई पनि सुपर इन्टेलिजेन्स शब्द उपयुक्त लागेको दाबी गर्नुभएको थियो। उहाँले पुरानो नामलाई कमजोर र गलत तथा नयाँ नामलाई बढी सही र महत्त्वपूर्ण भन्नुभएको थियो।

चीनले भने उक्त दाबी न पुष्टि गरेको छ, न खण्डन। मन्त्रालयका प्रवक्ताले यो प्रविधि निरन्तर विकसित भइरहेकाले सबै पक्षले संवाद, अनुभव आदानप्रदान र सहमति निर्माण अघि बढाउनुपर्ने बताएका छन्। शिखर वार्तापछि दुवै देशले यस क्षेत्रमा समन्वय गर्न र आकस्मिक घटनाबारे सूचना साटासाट गर्न छुट्टै सञ्चार संयन्त्र बनाउने सहमति गरेका छन्।

ट्रम्पले कृत्रिम बुद्धिमत्ताबाट मानवतामा गम्भीर जोखिम पुग्ने चिन्तालाई बारम्बार अस्वीकार गर्दै आउनुभएको छ। राष्ट्रपति सीले भने यसको विकास मानवीय नियन्त्रण र जिम्मेवार प्रयोगभित्र रहनुपर्ने धारणा राख्दै आउनुभएको छ।