खाद्य स्वच्छता ऐन संशोधनको मस्यौदामा जनताको सुझाव माग

स्वास्थ्य तथा खाद्य स्वच्छता मन्त्रालयले खाद्य स्वच्छता तथा गुणस्तर ऐन, २०८१ संशोधन गर्ने विधेयकको मस्यौदा सार्वजनिक गरेको छ। मन्त्रालयले उक्त मस्यौदामाथि सर्वसाधारण, सरोकारवाला तथा सम्बन्धित पक्षसँग राय र सुझाव मागेको छ। विधायन ऐन, २०८१ को दफा ६ ले दिएको व्यवस्थाअनुसार मस्यौदा सार्वजनिक गरिएको मन्त्रालयले जनाएको छ।

नेपाल सरकारको कार्य विभाजन नियमावली, २०८३ सँग ऐनलाई मेल खुवाउनुपर्ने आवश्यकता देखिएपछि संशोधनको तयारी गरिएको हो। ऐनका केही व्यवस्थालाई थप स्पष्ट बनाउनुपर्ने देखिएको पनि मन्त्रालयको भनाइ छ। प्रस्तावित संशोधनले खाद्य परीक्षण तथा अनुगमनका क्रममै कारबाहीको बाटो खोल्ने प्रस्ताव गरेको छ।

अनुगमनमा अखाद्य पदार्थ बिक्री वा वितरण गरेको भेटिएमा तत्कालै जरिवाना गर्न सकिने व्यवस्था मस्यौदामा प्रस्ताव गरिएको छ। न्यून गुणस्तरका खाद्य पदार्थ बेच्ने वा वितरण गर्नेलाई पनि तत्काल जरिवानाको दायरामा ल्याउने प्रस्ताव छ। खाद्य स्वच्छता र गुणस्तरसम्बन्धी कानुनलाई प्रभावकारी र कार्यान्वयनयोग्य बनाउन यो व्यवस्था ल्याउन लागिएको मन्त्रालयले जनाएको छ।

राय वा सुझाव भए २०८३ असोज १४ गतेभित्र पठाउन मन्त्रालयले अनुरोध गरेको छ। सुझाव मन्त्रालयको कानुन शाखाको इमेल ठेगानामा पठाउनुपर्नेछ। मन्त्रालयका अनुसार प्राप्त सुझावमध्ये आवश्यक कुरा समेटेर मस्यौदालाई अझ परिमार्जन गरिनेछ।