जेलेन्स्कीले लिमान नजिक अग्रपङ्क्तिका सैनिकलाई भेटे

युक्रेनका राष्ट्रपति भोलोदिमिर जेलेन्स्कीले बुधबार पूर्वी युक्रेनको लिमान क्षेत्र नजिक पुगेर अग्रपङ्क्तिमा खटिएका सैनिकसँग भेट गर्नुभएको छ। भेटका क्रममा उहाँले लिमान क्षेत्रमा अभियान सम्पन्न गरेका सैनिकलाई राज्यका तर्फबाट पुरस्कार प्रदान गर्नुभएको सामाजिक सञ्जालमार्फत जानकारी दिनुभएको छ। उहाँले सम्बन्धित ब्रिगेडका कमाण्डरसँग सैन्य एकाइले चलाइरहेको अभियानबारे छलफल पनि गर्नुभएको छ।

राष्ट्रपति जेलेन्स्कीले युक्रेनी सेनाले लिमान वरपरका केही भूभाग फेरि नियन्त्रणमा लिएको दाबी गर्नुभएको छ। यो कारबाही 'अपरेसन भिभाल्डी' नामको प्रतिरोध अभियानको हिस्सा भएको उहाँले बताउनुभएको छ। सन् २०२२ फेब्रुअरीमा रुसले आक्रमण गरेयता जेलेन्स्कीले पटक–पटक युद्ध मोर्चाका क्षेत्रको भ्रमण गर्दै आउनुभएको छ।

पूर्वी मोर्चामा फैलिएको 'किल जोन' का कारण दुवै पक्षका सेनालाई अघि बढ्न कठिन भएको छ। त्यहाँ विस्फोटक ड्रोनमार्फत सैनिक गतिविधिको निगरानी गरी लक्षित प्रहार हुने गरेको छ। दुवै पक्षले यस मोर्चामा निकै सीमित लाभ मात्र हासिल गर्न सकेका छन्।