घट्दो जन्मदर रोक्न सिङ्गापुरमा सरकारी कर्मचारीका लागि डेटिङ सेवा

घट्दो विवाह र न्यून प्रजनन दरको समस्या झेलिरहेको सिङ्गापुरले सरकारी कर्मचारीका लागि 'फर्स्टडेट' नामको डेटिङ सेवा सुरु गरेको छ। मंगलबार सार्वजनिक गरिएको यो सेवाले २१ देखि ३५ वर्ष उमेर समूहका कर्मचारीलाई लक्षित गरेको छ। सरकारी प्रविधि निकाय गोभटेकले सञ्चालनमा ल्याएको यो सेवामा प्रयोगकर्ताले साइनपासमार्फत लगइन गर्नुपर्छ।

त्यसपछि उनीहरूले रुचि, बानी, मूल्य–मान्यता, धार्मिक प्राथमिकता र सम्बन्धमा स्वीकार्य नहुने विषयको विवरण भर्नुपर्छ। प्रणालीले धेरै विकल्पको सट्टा मेल खाने सीमित व्यक्ति मात्र देखाएर डेटिङ एपमा बारम्बार स्वाइप गर्दा हुने थकान घटाउने लक्ष्य राखेको छ। प्रोफाइल मेल खाने व्यक्तिले मात्र देख्ने र सम्पर्क विवरण दिने वा नदिने निर्णय प्रयोगकर्ता आफैँले गर्ने व्यवस्था छ।

भेटपछि प्रयोगकर्ताले स्टार रेटिङ र वैकल्पिक प्रतिक्रियामार्फत आफ्नो अनुभव बताउन सक्छन्।