जानकी मन्दिरलाई युनेस्को विश्व सम्पदा सूचीमा राख्ने प्रक्रिया सुरु

धनुषाको जनकपुरधामस्थित ऐतिहासिक तथा धार्मिक तीर्थस्थल जानकी मन्दिरलाई युनेस्कोको विश्व सांस्कृतिक सम्पदा सूचीमा समावेश गराउने औपचारिक प्रक्रिया सुरु भएको छ। नेपाल सरकारले मन्दिर क्षेत्रलाई संरक्षित स्मारक क्षेत्र घोषणा गरेलगत्तै सरोकारवालाहरूले यसको विश्वव्यापी मान्यता र संरक्षणका लागि पहल थालेका हुन्। यसका लागि जनकपुरधाम उपमहानगरपालिकाका नगरप्रमुख मनोजकुमार साहको संयोजकत्वमा एउटा विशेष समिति बनाइएको छ।

समितिले मन्दिरको धार्मिक, सांस्कृतिक र वास्तुकलागत महत्त्व समेटिएको विस्तृत प्रतिवेदन तयार पार्नेछ। मन्दिरको पुरानो स्वरूप जोगाउँदै भविष्यमा हुने भौतिक विकासका कामलाई व्यवस्थित गर्नेमा सरोकारवालाहरू सहमत भएका छन्।