बीमा दाबीको सर्भेयर अब स्वचालित प्रणालीबाट खटिने

नेपाल बीमा प्राधिकरणले बीमा दाबीको क्षति मूल्याङ्कन गर्ने सर्भेयर अब कम्प्युटर प्रणालीमार्फत स्वचालित रूपमा खटाउने व्यवस्था मिलाएको छ। प्राधिकरणले 'अटोमेटिक सर्भेयर डेपुटेसन सिस्टम' नामको यो प्रणाली असोज १२ गते सोमबार साँझदेखि परीक्षणमा ल्याएको छ। दाबी दर्ता भएपछि प्रणालीले दाबीको प्रकृति, सर्भेयरको विज्ञता, भौगोलिक स्थान, उपलब्धता, वरिष्ठता, पोर्टफोलियो र पहिले पाएको कामका आधारमा उपयुक्त व्यक्ति छान्नेछ।

हाल सर्भेयर छनोट वैज्ञानिक र पारदर्शी नभएको तथा कसैले धेरै र कसैले थोरै काम पाउने गरेको गुनासो आउने गरेको छ। बीमा कम्पनीले आफूखुसी सर्भेयर रोजेर काम दिने चलन नयाँ प्रणालीले घटाउने प्राधिकरणको अपेक्षा छ। निर्जीवन बीमा कम्पनीका सूचना प्रविधि र दाबी प्रमुख गरी करिब ३६ जनालाई असोज १३ गते अनलाइन तालिम दिने कार्यक्रम तय गरिएको छ।

त्यसपछि सर्भेयरलाई तालिम दिइने र पुनर्बीमा कम्पनीलाई पनि प्रणालीमा समेट्ने योजना छ। प्रणालीले दाबी प्रक्रियाको समय र लागत घटाउँदै पारदर्शिता र जवाफदेहिता बढाउने विश्वास गरिएको छ।