आवासीय चिकित्सकलाई होस्टल खाली गर्ने उर्दीमा सरकारले माफी माग्यो

सरकारले वीरगञ्जस्थित नेशनल मेडिकल कलेजका आवासीय चिकित्सकलाई होस्टल खाली गर्न दिइएको उर्दीप्रति माफी मागेको छ। बिहीबार शिक्षा तथा खेलकुद मन्त्रालयमा भएको छलफलमा शिक्षामन्त्रीका सल्लाहकार शैलेन्द्र झाले सरकारको तर्फबाट क्षमा माग्नुभएको हो। कलेजले प्रथम वर्षका चिकित्सकलाई १२ घण्टाभित्र होस्टल र क्वार्टर छाडेर कलेजको सम्पत्ति बुझाउन निर्देशन दिएको थियो।

झाले उक्त उर्दी आवेगमा जारी भएको र त्यसमा व्यक्तिगत अहम् झल्किएको बताउनुभएको छ। मौसम संवेदनशील रहेका बेला चिकित्सकलाई बासस्थान छाड्न बाध्य पार्नु अमानवीय भएको उहाँको भनाइ छ। मन्त्रालयले विषयलाई गम्भीर रूपमा लिएको बताउँदै उहाँले छिट्टै अध्ययनको वातावरण बनाउने प्रतिबद्धता जनाउनुभएको छ।

२४ दिनदेखि आन्दोलनमा रहेका ४० भन्दा बढी प्रथम वर्षका आवासीय चिकित्सक सिंहदरबारस्थित मन्त्रालय पुगेका थिए। उनीहरूले मन्त्रालयका वरिष्ठ अधिकारीसमक्ष आफ्नो शैक्षिक र पेसागत जीवनका समस्या राखेका छन्। कलेज प्रशासनको अत्यधिक दबाब र सिकाइमैत्री वातावरणको अभावबारे उनीहरूले गुनासो गरेका छन्।

चिकित्सकले कलेजमा शान्त र मर्यादित वातावरण सुनिश्चित गरी अवरोधबिना पढाइमा फर्कने अवस्था बनाउन माग गरेका छन्।