निजी मेडिकल कलेजको शुल्क बढाउने माग र विदेशी विद्यार्थी कोटा बहस

निजी मेडिकल तथा डेन्टल कलेजहरूले एमबीबीएस र बीडीएसको शुल्क तत्काल पुनरावलोकन गर्न सरकारसँग माग गरेका छन्। एसोसिएसन अफ प्राइभेट मेडिकल एन्ड डेन्टल कलेजेज नेपालले बिहीबार काठमाडौँमा पत्रकार सम्मेलन गरी यस्तो माग राखेको हो। एसोसिएसनका अध्यक्ष प्राडा ज्ञानेन्द्रमान सिंह कार्कीले सन् २०१९ यता शुल्क पुनरावलोकन नभएको बताउनुभएको छ।

उहाँका अनुसार जनशक्ति, उपकरण, औषधि, विद्युत् र अस्पताल सञ्चालनको खर्च लगातार बढेको छ। शुल्क नबढ्दा गुणस्तर कायम राख्न, नयाँ उपकरण थप्न र पूर्वाधार स्तरोन्नति गर्न कठिन भएको सञ्चालकहरूको भनाइ छ। एसोसिएसनले 'नेपालमा चिकित्सा शिक्षा: चुनौती र अवसर' नामक अवधारणापत्र पनि सार्वजनिक गरेको छ।

त्यसमा विदेशी विद्यार्थीको कोटा बढाएर बदलामा नेपाली विद्यार्थीका लागि छात्रवृत्ति कोटा थप्न प्रस्ताव गरिएको छ। एसोसिएसनले नेपाललाई चिकित्सा शिक्षा र मेडिकल टुरिजमको केन्द्र बनाउन सकिने जनाएको छ। उसले सरकारसमक्ष छ बुँदे प्रस्ताव राखेको छ।

प्रस्तावमा प्रमाणित क्षमताअनुसार भर्ना अनुमति, विदेशी विद्यार्थीका लागि छुट्टै व्यवस्था र अन्तर्राष्ट्रिय भर्ना प्रक्रिया सरल बनाउने विषय समेटिएका छन्। नेपाली विद्यार्थीलाई छात्रवृत्तिमा प्राथमिकता र वैज्ञानिक आधारमा शुल्क पुनरावलोकनको माग पनि प्रस्तावमा छ।