पाँच जिल्लाका ६ सामुदायिक विद्यालयलाई शैक्षिक सामग्री सहयोग

एनआईसी एशिया बैंकले संस्थागत सामाजिक उत्तरदायित्वअन्तर्गत पाँच जिल्लाका ६ सामुदायिक विद्यालयलाई शैक्षिक सामग्री र उपकरण सहयोग गरेको छ। ललितपुर, कालिकोट, डोटी, अछाम र गोरखाका विद्यालयलाई पानी शुद्धीकरण प्लान्ट, पोसाक, झोला, प्रिन्टर, ल्यापटप, डेस्कटप कम्प्युटर र प्रोजेक्टर दिइएको छ। सहयोग पाउने विद्यालयमा ललितपुरको गोदावरी नगरपालिका–१ स्थित दमाइटार आधारभूत विद्यालय र कालिकोटको नरहरीनाथ गाउँपालिका–६ स्थित नन्दादेवी माध्यमिक विद्यालय छन्।

डोटीको शिखर नगरपालिका–५ स्थित राधाकृष्ण माध्यमिक विद्यालय र गोरखा नगरपालिका–३ स्थित विन्ध्यवासिनी माध्यमिक विद्यालयले पनि सहयोग पाएका छन्। अछामको बान्नीगढी जयगढस्थित नन्दा माध्यमिक विद्यालय र राष्ट्रभाषा माध्यमिक विद्यालय पनि सूचीमा छन्। असोज २१ गते दमाइटार आधारभूत विद्यालयलाई पानी शुद्धीकरण प्लान्ट र पोसाक हस्तान्तरण गरिएको छ।

बैंकका अनुसार उक्त विद्यालयमा ९९ भन्दा बढी विद्यार्थी अध्ययनरत छन्। बैंकका काठमाडौँ साउथ सर्कल हेड उज्ज्वल रिमालसहितको टोलीले प्रधानाध्यापक अमृतनाथ गौतमलाई सामग्री बुझाएको हो। बैंकका चापागाउँ शाखा प्रमुख तुलसी ढुंगाना र सीएसआर इन्चार्ज ठाकुर श्रेष्ठ पनि हस्तान्तरणमा सहभागी थिए।