जुम्ली स्याउ ब्रान्ड बन्दै, किसानको आम्दानी बढ्दै

जुम्लाको स्याउ अहिले देशभरका बजारमा खोजिने ब्रान्डका रूपमा स्थापित हुँदै गएको छ र यसले स्थानीय किसानलाई भरपर्दो आम्दानी दिन थालेको छ। कर्णाली राजमार्गले सुर्खेत र जुम्लालाई जोड्नुअघि बजार पहुँच नहुँदा धेरैजसो स्याउ बोटमै कुहिएर खेर जाने गरेको थियो। मनाङ र मुस्ताङको स्याउजस्तै जुम्ली स्याउ पनि पछिल्ला केही वर्षदेखि देशभरको बजारमा पहिलो रोजाइ बन्न थालेको छ।

संयुक्त राष्ट्रसङ्घीय विकास कार्यक्रम, युएनडिपीअन्तर्गतको रेरास परियोजनाको आर्थिक र प्राविधिक सहयोग तथा स्थानीय सहकारीको सक्रियताले खेती व्यावसायिक र आधुनिक बनेको छ। पहिले किसानले फल टिप्दा हाँगै तानेर भाँच्ने गर्दा अर्को वर्षका कोपिला बिग्रिने गरेका थिए। अहिले परियोजनाले चलाएको कृषक पाठशालाबाट किसानले बगैँचा व्यवस्थापनको तालिम पाएका छन्।

सिँचाइ, जैविक मल र आधुनिक प्रविधिको प्रयोगले उत्पादन बढेको छ। सहकारीले बजार व्यवस्थापन सम्हालेपछि किसानले चित्तबुझ्दो मूल्य पाएका छन् र नक्कली जुम्ली स्याउ बेच्न रोक लगाइएको छ।