भारतीय वायुसेनाको प्रमुखमा अशुतोष दीक्षित नियुक्त

भारत सरकारले एयर मार्सल अशुतोष दीक्षितलाई भारतीय वायुसेनाको २९ औँ प्रमुखमा नियुक्त गरेको छ। भारतको रक्षा मन्त्रालयले सामाजिक सञ्जाल एक्समार्फत नियुक्तिको जानकारी सार्वजनिक गरेको छ। दीक्षित हाल भारतीय वायुसेनाको उपप्रमुखका रूपमा कार्यरत हुनुहुन्छ।

उहाँले ३१ अक्टोबरदेखि एयर चिफ मार्सल अमरप्रीत सिंहको ठाउँमा वायुसेनाको नेतृत्व सम्हाल्नुहुनेछ। वर्तमान प्रमुख अमरप्रीत सिंह सोही दिन सेवाबाट अवकाश लिँदै हुनुहुन्छ। दीक्षित प्रायोगिक परीक्षण पाइलट तथा योग्यताप्राप्त उडान प्रशिक्षक हुनुहुन्छ।

उहाँसँग साढे ३ हजार घण्टाभन्दा बढी उडान अनुभव छ। उहाँले एकीकृत रक्षा कर्मचारी मुख्यालयमा अध्यक्षमातहतको एकीकृत कर्मचारी समितिको प्रमुखको जिम्मेवारी सम्हालिसक्नुभएको छ। उहाँले केन्द्रीय वायु कमान्डको एयर अफिसर कमान्डिङ इन चिफका रूपमा पनि काम गर्नुभएको छ।