अनमोल र प्रिन्सी अभिनीत 'बाटुलो जून' को टिजर सार्वजनिक

अभिनेता अनमोल केसी र प्रिन्सी खतिवडा अभिनीत चलचित्र 'बाटुलो जून' को टिजर शुक्रबार सार्वजनिक भएको छ। भुवन केसीले निर्देशन गरेको यो चलचित्र कात्तिक २६ गते, भाइटीकाको भोलिपल्टदेखि प्रदर्शनमा आउने जनाइएको छ। करिब २ मिनेट लामो टिजरले ३० को दशकको गाउँले परिवेश, त्यस बेलाको जीवनशैली र प्रेम गर्ने तरिकाको झलक दिएको छ।

टिजरअनुसार अनमोलले आफ्ना बुबा भुवन केसीको युवावस्थाको भूमिका निभाउनुभएको छ, जसमा एक शिक्षक र उनकै विद्यार्थीबीचको प्रेमकथा देखाइएको छ। टिजरले दुःखान्त प्रेमकथाको सङ्केत गरेको छ। फिल्ममा देखिएको जुँगालाई अनमोलले सामाजिक सञ्जालमा बुबाप्रतिको सानो श्रद्धा भनेर व्याख्या गर्नुभएको छ।

गत वर्षको चर्चित फिल्म 'जेरी अन टप' पछि अनमोलको यो नयाँ फिल्म हो। प्रिन्सी खतिवडाले यसैबाट ठूलो पर्दामा पहिलो पटक पाइला राख्नुभएको छ भने बेल्जियममा बस्दै आउनुभएकी अभिनेत्री गरिमा पन्तले पुनरागमन गर्नुभएको छ। भुवन केसीसँगै न्यान्सी खड्का, प्रकाश घिमिरे र लक्ष्मीनाथ तिमिल्सिनालगायतको पनि अभिनय छ।

सनराइज पिक्चरको ब्यानरमा बनेको फिल्मका निर्माता जिया केसी र भविष्य खड्का तथा सहनिर्माता विवेक थापा हुनुहुन्छ। पटकथा सामिप्यराज तिमल्सेना र सरिन पोखरेलले लेख्नुभएको छ। छायाङ्कन राजेश श्रेष्ठ र सम्पादन कृष्ण भण्डारीको रहेको छ।