धुलिखेलमा अन्तर्राष्ट्रिय हक्की रङ्गशाला निर्माण हुने

काभ्रेपलाञ्चोकको धुलिखेलमा अन्तर्राष्ट्रिय मापदण्डअनुसारको हक्की रङ्गशाला र प्रशिक्षण केन्द्र बनाउने तयारी अघि बढेको छ। धुलिखेल नगरपालिका–११ र १२ को सिमानामा पर्ने चिसापानी डाँडामा रङ्गशाला बनाउने गरी नगरपालिका र जिल्ला खेलकुद विकास समितिबीच सम्झौता भएको छ। नगरपालिकाका तर्फबाट कार्यवाहक नगरप्रमुख निराजन जङ्गम र समितिका तर्फबाट अध्यक्ष मानवीर वाइबाले बिहीबार सम्झौतापत्रमा हस्ताक्षर गर्नुभएको छ।

नेपाल हक्की सङ्घलाई नगरपालिकाले ४० वर्षसम्म उपयोग गर्न दिइसकेको करिब २०० रोपनी जग्गामै रङ्गशाला बनाइनेछ। चालु आर्थिक वर्ष २०८३/०८४ मा सङ्घीय सरकारले ३ करोड रुपैयाँ बजेट विनियोजन गरेको नगरपालिकाका शिक्षा शाखा अधिकृत भोजकुमार ठकुरीले जानकारी दिनुभएको छ। परियोजना राष्ट्रिय खेलकुद परिषद्मार्फत कार्यान्वयन हुनेछ र दुई वर्षभित्र निर्माण सम्पन्न गर्ने लक्ष्य छ।

प्रतियोगिता नहुँदा स्थानीय विद्यालय, क्लब र खेलाडीले रङ्गशालामा नियमित अभ्यास गर्न पाउनेछन्। कार्यवाहक नगरप्रमुख जङ्गमले धुलिखेललाई खेलकुदमैत्री पालिका बनाउने लक्ष्यअनुसार योजना ल्याइएको बताउनुभएको छ। जिल्लामा हक्की खेल लामो समयदेखि पर्याप्त पूर्वाधारको अभावमा सीमित हुँदै आएको छ।

अध्यक्ष वाइबाले थप बजेट र पूर्वाधारका लागि सरकारी निकायसँग समन्वय गर्ने प्रतिबद्धता जनाउनुभएको छ। जिल्ला हक्की सङ्घका अध्यक्ष स्वस्तिक व्यञ्जुले परियोजना पूरा गर्न सक्रिय सहयोग गर्ने बताउनुभएको छ। वडा नं.

१२ का अध्यक्ष मोहनप्रसाद लामिछानेले रङ्गशालाबाट वडा, पालिका र देशलाई नै फाइदा पुग्ने विश्वास व्यक्त गर्नुभएको छ।