बालगोपाल साहुखल एएफसी प्रो लाइसेन्स पाउने पहिलो नेपाली प्रशिक्षक

नेपाली फुटबलका पूर्वखेलाडी तथा प्रशिक्षक बालगोपाल साहुखलले प्रो लाइसेन्स प्राप्त गर्नुभएको छ। प्रोफेसनल डिप्लोमा कोचिङ कोर्स पूरा गरेपछि उहाँले यो लाइसेन्स पाउनुभएको हो। यससँगै साहुखल प्रो लाइसेन्स पाउने पहिलो नेपाली प्रशिक्षक बन्नुभएको छ।

फुटबल अस्ट्रेलिया र एसियन फुटबल महासंघ (एएफसी) दुवैले मान्यता दिएको यो कोर्स पेसेवर फुटबलको उच्च तहमा प्रशिक्षण दिन चाहने प्रशिक्षकलाई लक्षित गरी बनाइएको हो। सिड्नी फुटबल एसोसिएसनअन्तर्गत सञ्चालित कोर्स चार चरणमा विभाजित थियो र यसलाई पूरा गर्न एक वर्ष लागेको थियो। कोर्सको मुख्य केन्द्र उन्नत प्रशिक्षण रणनीति र नेतृत्व क्षमता थियो।

यसका साथै पेसेवर वातावरणमा प्रशिक्षक टोली व्यवस्थापन र खेलाडी विकाससम्बन्धी विषय पनि समेटिएका थिए। साहुखल नेपालको ए डिभिजन क्लबबाट खेलिसक्नुभएको छ। उहाँले उमेर समूहका टोलीमा प्रशिक्षकका रूपमा पनि काम गरिसक्नुभएको छ।

साहुखलले आफ्नो सन्देशमा 'मेरो यात्रामा साथ दिनुहुने सबैलाई धन्यवाद' भन्दै आभार व्यक्त गर्नुभएको छ।