अपडेट – ऊर्जा युद्धविराम: ट्रम्पको हतियार चेतावनी, जेलेन्स्कीको जवाफी कदमको चेतावनी

युक्रेनका राष्ट्रपति भोलोदिमिर जेलेन्स्कीले रुसले ऊर्जा युद्धविराम पालना नगरे जवाफी कदम चाल्ने चेतावनी दिनुभएको छ। सोमबार वार्सा सुरक्षा मञ्चलाई भिडियोमार्फत सम्बोधन गर्दै उहाँले रुसले ऊर्जा पूर्वाधारमा आक्रमण रोक्न नमाने युक्रेनले पनि प्रतिकार जारी राख्ने बताउनुभएको छ। अमेरिकी राष्ट्रपति डोनाल्ड ट्रम्पले रुस र युक्रेनबीच ऊर्जा पूर्वाधारमा आक्रमण रोक्ने युद्धविराम घोषणा गरे पनि त्यसको विस्तृत विवरण सार्वजनिक गर्नुभएको छैन।

उक्त घोषणाले युक्रेनलाई अचम्मित बनाएको छ भने रुसले औपचारिक प्रतिक्रिया दिएको छैन। युक्रेनका पश्चिमी सहयोगीले भने यो पहललाई समर्थन गरेका छन्। जेलेन्स्कीले अमेरिकी र रुसी अधिकारीबीचको वार्ताको विवरण पर्खिरहेको बताउँदै युद्धविराम लागू गराउन अमेरिकाले चाल्ने ठोस कदम महत्त्वपूर्ण हुने बताउनुभएको छ।

यसैबीच, फाइनान्सियल टाइम्सका अनुसार अमेरिकी अधिकारीहरूले शनिबार र आइतबार युक्रेन र युरोपेली देशलाई फोन गरेर रुसी तेल प्रशोधन केन्द्रमा आक्रमण रोक्न दबाब दिएका छन्। त्यस्ता आक्रमण नरोकिए युक्रेनलाई हतियार खरिदमा सहयोग गर्ने 'पर्ल' संयन्त्र र गुप्तचर सूचना आदानप्रदान रोक्ने चेतावनी दिइएको युरोपेली अधिकारीहरूले बताएका छन्। ह्वाइट हाउसले यी फोनबारे पुष्टि वा टिप्पणी गरेको छैन।