दिल्लीको जन्तरमन्तरमा प्रदर्शन निषेध, मतदाता सूची संशोधनविरुद्ध विरोध जारी

भारतको राजधानी नयाँदिल्लीमा विरोध प्रदर्शन र धर्नाका लागि तोकिएका स्थलको सूचीबाट जन्तरमन्तर हटाइएको छ। दिल्ली प्रहरी आयुक्त अनुराग कुमारले सोमबार जारी गरेको सूचनाअनुसार यो निर्णय केन्द्रीय गृह मन्त्रालयले बनाएको समितिको सिफारिसमा गरिएको हो। अब प्रदर्शनका लागि रामलीला मैदान, बुराडी मैदान र पूर्वी दिल्लीको सीबीडी मैदान तोकिएका छन्।

ती स्थलमा प्रदर्शन गर्ने मानक सञ्चालन कार्यविधि छुट्टै जारी हुने सूचनामा उल्लेख छ। यो निर्णय मतदाता सूची संशोधनविरुद्ध दिल्लीमा भइरहेको आन्दोलनका बीच आएको हो। विपक्षी दल, विद्यार्थी समूह र अधिकारकर्मीहरूले मुख्य निर्वाचन आयुक्त ज्ञानेश कुमारको राजीनामा माग गरिरहेका छन्।

सञ्चारमाध्यमका अनुसार संशोधनका क्रममा १३ करोडभन्दा बढी नाम सूचीबाट हटाइएका छन्। आलोचकहरूले यसबाट सत्तारूढ भारतीय जनता पार्टीलाई फाइदा पुग्ने र मुस्लिम समुदाय प्रभावित हुन सक्ने बताएका छन्। निर्वाचन आयोगले भने आरोप अस्वीकार गर्दै दोहोरो र नक्कली विवरण हटाउन संशोधन गरिएको जनाएको छ।

काङ्ग्रेस नेता राहुल गान्धीले समर्थकलाई सर्वोच्च अदालततर्फ पदयात्रा गर्न आह्वान गर्नुभएपछि प्रहरीले सोमबार ६ वटा मेट्रो स्टेसन बन्द गर्दै मुख्य सडकमा अवरोध राखेको छ। मध्य दिल्लीमा लगातार तेस्रो दिन हजारौँ सुरक्षाकर्मी परिचालन गरिएका छन्। विपक्षी नेता र पत्रकारहरूले प्रहरीले सांसद, पत्रकार र प्रदर्शनकारीमाथि दुर्व्यवहार गरेको आरोप लगाएका छन्।