दसैँ बिदामा चितवन र शुक्लाफाँटामा सफारी खुला, अन्नपूर्ण पदमार्गमा पर्यटक बढ्दै

चितवन राष्ट्रिय निकुञ्जमा असोज २३ गतेदेखि जीप सफारी फेरि सुरु भएको छ। मनसुन सुरु भएदेखि बन्द यो सेवा, निकुञ्जका सूचना अधिकारी अविनाश थापा मगरका अनुसार बाढीले बिगारेका बाटो मर्मत, ढलेका रूख हटाउने र झाडी सफा गर्ने काम सकिएपछि खुला गरिएको हो। असोजको दोस्रो साताको बाढीले सफारी मार्गमा क्षति पुर्‍याएकाले खोल्न ढिलाइ भएको उहाँले बताउनुभएको छ।

निकुञ्जका अनुसार सौराहा, कसरा, मेघौली, अमलटारी र माडीबाट गरी करिब ७४ जीप सफारीमा सञ्चालन हुन्छन्। शुक्लाफाँटा राष्ट्रिय निकुञ्जले पनि दसैँतिहारमा घुम्न आउने पर्यटकलाई लक्षित गरी जंगल सफारी खुला गरेको छ। सूचना अधिकारी पुरुषोत्तम वाग्लेका अनुसार मझगाउँबाट बाबाताल, रानीताल हुँदै शुक्लाफाँटा घाँसे मैदान र बर्कौला हुँदै मझगाउँ फर्किने मुख्य रुट खोलिएको छ।

वर्षा रोकिएपछि भित्री रुट पनि खोल्ने तयारी रहेको उहाँले बताउनुभएको छ। निकुञ्जका अनुसार यहाँ करिब २ हजार ३०० बाह्रसिङ्गा र करिब ५० पाटेबाघ छन्। यता बाढी र हिमपातले प्रभावित अन्नपूर्ण पदमार्गमा पर्यटक फेरि बढ्न थालेका छन्।

एक्यापको धरापानीस्थित पर्यटक जाँच तथा सूचना केन्द्रका भूपेन्द्र गुरुङका अनुसार अहिले दैनिक करिब १५० देखि २०० पर्यटक आइरहेका छन्। केन्द्रका अनुसार असोज १८ देखि २५ गतेसम्म करिब १ हजार ४४७ पर्यटक पुगेका छन्। थोरङला पासको बाटोमा हिउँ पन्छाइएपछि मनाङबाट मुस्ताङ जान सहज भएको उहाँले बताउनुभएको छ।