दसैँमा बर्दियाका थारू बस्तीमा हुर्डुङ्ग्वा नाचको रौनक

दसैँ नजिकिएसँगै बर्दियाका देसाउरी थारू बस्तीमा परम्परागत हुर्डुङ्ग्वा नाचको रौनक छाएको छ। दिनभर खेतबारीको काम सकेपछि गाउँका महिला र पुरुष साँझ बडघर वा मटावाँको आँगनमा जम्मा भई मादल र मञ्जिराको तालमा रातिसम्म गीत गाउँदै नाच्ने गरेका छन्। गुलरिया नगरपालिका-१२ भैसाही गाउँमा हरेक रात यो नाच भइरहेको स्थानीय तेतिराम थारूले बताउनुभएको छ।

बाँसगढी नगरपालिका-६ मोतिपुरमा पनि दैनिक नाच भइरहेको र त्यसका लागि मादल मर्मत, गायक छनोट तथा नाच टोली तयारी गरिएको स्थानीय रामकिसुन थारूले जानकारी दिनुभएको छ। नाच लचारी गीतबाट सुरु हुन्छ, जसपछि दुई समूहले पालैपालो गीत दोहोर्‍याउँदै तालमा सामूहिक नृत्य प्रस्तुत गर्छन्। टोलीको मुख्य अगुवालाई मोहिया र दोस्रो अगुवालाई पिछगुन्या भनिन्छ, भने पुरुषले महिलाको भेष धारण गरी बठिन्याको भूमिका निभाउँछन्।

थारू संस्कृतिका जानकार पर्शुराम थारूका अनुसार दिउँसो गाइने गीतलाई दिनगित्वा, रातिको गीतलाई कहरा र बिहानको गीतलाई बिहगरा भनिन्छ। यसबाहेक लचारी, फूलवार, चुदरी बिलाप र महिरावानजस्ता गीत पनि गाइन्छन्, जुन रामायण र शिव-पार्वतीको महिमासँग जोडिएका छन्। बारबर्दिया बरघर सञ्जालका अध्यक्ष बहादुर बैरागी थारूका अनुसार भदौको हरेरी पूजादेखि सुरु हुने यो नाच दसैँ सकिएको करिब एक सातासम्म चल्छ।

देसाउरी थारू समुदाय बर्दियाका साथै बाँके, दाङ, कैलाली र कञ्चनपुरमा पनि बसोबास गर्छ।