खैबर पख्तुनख्वामा सङ्कटकालपछि इमरान खानको पार्टीका सयौँ सदस्य पक्राउ

पाकिस्तानको खैबर पख्तुनख्वा प्रान्तमा सङ्कटकाल लागू भएपछि प्रहरीले पूर्वप्रधानमन्त्री इमरान खानको दल पाकिस्तान तहरीक–ए–इन्साफ, पीटीआईका करिब २७८ सदस्यलाई हिरासतमा लिएको छ। नाम नखुलाउने सर्तमा दुई प्रहरी अधिकारीले आइतबारदेखि धरपकड भइरहेको जानकारी दिएका छन्। खानको रिहाइ माग्दै आइतबार भएको सरकारविरोधी प्रदर्शनपछि राष्ट्रपति आसिफ अली जरदारीले सङ्कटकाल घोषणा गर्दै पीटीआई नेतृत्वको प्रान्तीय सरकार निलम्बन गर्नुभएको छ।

कानुनमन्त्री आजम नजिर तरारका अनुसार अब प्रान्तको शासन गभर्नरले सम्हाल्नेछन्, जसको प्रारम्भिक कार्यकाल ६ महिनाको हुनेछ। अफगानिस्तानसँग सीमा जोडिएको उक्त प्रान्तमा बढ्दो उग्रवादी हिंसा रोक्न प्रान्तीय सरकार असफल भएको सङ्घीय सरकारको आरोप छ। पीटीआईले भने सङ्कटकाललाई अलोकतान्त्रिक भन्दै विरोध गरेको छ।

पार्टीका अनुसार मुख्यमन्त्री सोहेल अफ्रिदीलाई पक्राउ गरिएको छ, र एक प्रशासनिक अधिकारीले उहाँलाई आधिकारिक निवासमै सुरक्षात्मक हिरासतमा राखिएको बताउनुभएको छ। खानका समर्थकहरूले कठिन आर्थिक अवस्थाप्रति असन्तुष्टि जनाउँदै प्रदर्शन गरिरहेका छन् र हजारौँ समर्थक पदयात्रामा सहभागी छन्। सङ्कटकालकै कारण पाकिस्तान क्रिकेट बोर्डले प्रेसिडेन्ट्स ट्रफीका पेशावर र एबटाबादका खेल बुधबारदेखि शेखपुरा र लाहोर सारेको छ।