एल निनोले समुद्री तापक्रमको रेकर्ड तोड्यो, सन् २०२७ मा विश्व तापक्रम बढ्ने चेतावनी

युरोपेली सङ्घको कोपर्निकस जलवायु परिवर्तन सेवाका अनुसार शक्तिशाली एल निनोका कारण प्रशान्त महासागरको मुख्य निगरानी क्षेत्रमा गत सेप्टेम्बरमा समुद्री सतहको तापक्रम अहिलेसम्मकै उच्च बिन्दुमा पुगेको छ। कोपर्निकसका अनुसार ‘निनो ३.४’ भनिने क्षेत्रमा तापक्रम करिब २९.७० डिग्री सेल्सियस मापन गरिएको छ। यो तापक्रम सन् १९८२–१९८३, १९९७–१९९८ र २०१५–२०१६ का ठूला एल निनोका बेला दर्ता भएको भन्दा बढी हो।

तर जलवायु परिवर्तनले महासागर पहिल्यै तातिसकेकाले यसलाई इतिहासकै सबैभन्दा शक्तिशाली एल निनो भन्न नसकिने संस्थाले स्पष्ट पारेको छ। सेप्टेम्बरमा विश्वभरको समुद्री सतहको औसत तापक्रम करिब २१.०५ डिग्री सेल्सियस पुगेको कोपर्निकसले जनाएको छ। सोही महिना पृथ्वीको औसत सतही तापक्रम करिब १६.२७ डिग्री सेल्सियस रहेको छ, जुन पूर्वऔद्योगिक कालको औसतभन्दा करिब १.६३ डिग्री बढी हो।

कोपर्निकसका निर्देशक कार्लो बुन्टेम्पोले सन् २०२७ सम्म पनि मासिक तापक्रम पूर्वऔद्योगिक स्तरभन्दा करिब १.५ डिग्री सेल्सियसभन्दा माथि रहन सक्ने बताउनुभएको छ। वैज्ञानिकहरूले सन् २०२७ मा विश्वको तापक्रमले नयाँ रेकर्ड बनाउन सक्ने चेतावनी दिएका छन्।