साउदी अरबतर्फ हुथीको ड्रोन र क्षेप्यास्त्र रोकियो, इरानद्वारा संवादको प्रस्ताव

साउदी नेतृत्वको गठबन्धनले हुथी विद्रोहीले साउदी अरबतर्फ प्रहार गरेको एउटा ड्रोन र एउटा ब्यालिस्टिक क्षेप्यास्त्र आकाशमै रोकेर नष्ट गरेको जनाएको छ। गठबन्धनका प्रवक्ता तुर्की अल–मालिकीले सोमबार सामाजिक सञ्जाल एक्समा छुट्टाछुट्टै वक्तव्य जारी गर्दै यसबारे जानकारी दिनुभएको छ। उहाँका अनुसार ड्रोन पूर्वी प्रान्तमा रोकिएको थियो भने क्षेप्यास्त्र दक्षिणपश्चिमी सहर खमिस मुशैततर्फ लक्षित थियो।

यसअघि आइतबार रियादको किङ खालिद अन्तर्राष्ट्रिय विमानस्थल र दमामनजिकको किङ फहद अन्तर्राष्ट्रिय विमानस्थल आक्रमणको निशानामा परेका थिए। हुथी समूहले यात्रुहरूलाई साउदी विमानस्थल र हवाईमार्ग प्रयोग नगर्न चेतावनी दिएको छ। उक्त समूहले ब्यालिस्टिक र क्रुज क्षेप्यास्त्रसँगै ड्रोनसमेत प्रहार गरेको दाबी गरेको छ।

यही तनावबीच इरानका विदेशमन्त्री सैयद अब्बास अराघचीले आइतबार साउदी विदेशमन्त्री राजकुमार फैसल बिन फरहानसँग टेलिफोन वार्ता गर्नुभएको छ। इरानी सरकारी समाचार संस्था इरनाका अनुसार अराघचीले साउदी अरब र यमनबीच संवाद अघि बढाउन सहयोग गर्न इरान तयार रहेको बताउनुभएको छ। उहाँले पश्चिम एसियाको सङ्कट सैन्य बाटोबाट समाधान नहुने भन्दै राजनीतिक संवाद र कूटनीतिक पहलमा जोड दिनुभएको छ।