डिजिटल बोर्ड र पुस्तिकामार्फत सुदूरपश्चिम चिनाउँदै धनगढी

धनगढी उपमहानगरपालिकाले सुदूरपश्चिमको पर्यटन र पहिचान प्रवर्द्धन गर्न डिजिटल बोर्ड सञ्चालनमा ल्याएको छ। धनगढी–१ स्थित जेन्जी मार्गको पार्कअगाडि जडान गरिएको बोर्डको आइतबार सुदूरपश्चिम प्रदेशका मुख्यमन्त्री खगराज भट्टले उद्घाटन गर्नुभएको छ। उपमहानगरका अनुसार बोर्ड हरेक दिन साँझ ६ बजेदेखि राति ९ बजेसम्म गरी तीन घण्टा सञ्चालन हुनेछ।

बोर्डमा प्रदेशका प्रमुख धार्मिक र पर्यटकीय स्थल, उपमहानगरका रचनात्मक कार्यक्रम र ट्राफिकसम्बन्धी जानकारी देखाइनेछ। आधुनिक प्रविधिले धनगढीको सौन्दर्य बढाउने र सूचना प्रवाह प्रभावकारी बनाउने अपेक्षा उपमहानगरले लिएको छ। उद्घाटनका क्रममा मुख्यमन्त्री भट्टले अहिलेको समय डिजिटल प्रविधि र नवप्रवर्तनको भएको बताउँदै धनगढीले यसको थालनी गरेको उल्लेख गर्नुभएको छ।

नगरप्रमुख गोपाल हमालले प्राकृतिक र धार्मिक सम्पदाको उचित उपयोगबाट मात्र प्रदेश समृद्ध बन्न सक्ने बताउनुभएको छ। उहाँले प्रदेशका सबै ८८ स्थानीय तहलाई आफ्ना असल अभ्यास र उपलब्धिको विवरण उपलब्ध गराउन आग्रह गर्नुभएको छ। उद्घाटनसँगै 'हाम्रो सुदूरपश्चिम, हामी चिनाउँछौँ' अभियानअन्तर्गत तयार पारिएका करिब दुई दर्जन पर्यटन प्रवर्द्धन पुस्तिका विमोचन गरिएको छ।

पुस्तिकामा रामारोशन क्षेत्र, सालमुनी, पादुका त्रिवेणी धाम, बैद्यनाथ धाम र भागेश्वर मन्दिरलगायत गन्तव्यको विवरण समेटिएको छ। यी गन्तव्यलाई राष्ट्रिय र अन्तर्राष्ट्रिय स्तरमा चिनाई आन्तरिक तथा बाह्य पर्यटक आकर्षित गर्ने अभियानको लक्ष्य छ।