रुसविरुद्ध नेटोको सैन्य चेतावनी, युरोपेली नेताको कडा अडान

नेटोका सर्वोच्च सहयोगी कमान्डर युरोप, अमेरिकी जनरल एलेक्सस ग्रिन्केविचले रुसको सम्भावित आक्रमण रोक्ने र आवश्यक परे परास्त गर्ने क्षमता गठबन्धनसँग रहेको सन्देश दिन लाग्नुभएको छ। अधिकारीहरूका अनुसार उहाँले पोल्यान्डको राजधानी वार्सामा भइरहेको सुरक्षा सम्मेलनमा नेटोको 'विजयको सिद्धान्त' प्रस्तुत गर्नुहुनेछ। नेटोले रक्षा योजना गोप्य राख्दै आएकाले सम्बोधनमा रणनीतिका विस्तृत विवरण आउने सम्भावना कम छ।

जर्मनीको एक विमानस्थलमा विस्फोटक पदार्थसहितको ड्रोन फेला परेपछि युरोपमा रुसी गतिविधिप्रति चासो बढेको छ। पश्चिमी अधिकारीहरूले युक्रेनलाई साथ दिने देशमा मस्कोले तोडफोड र हस्तक्षेप बढाएको आरोप लगाएका छन्। वार्सा सुरक्षा फोरमलाई सोमबार सम्बोधन गर्दै पोल्यान्डका प्रधानमन्त्री डोनाल्ड टस्कले रुसलाई नियन्त्रणमा राख्न युरोप र अमेरिका थप निर्णायक बन्नुपर्ने बताउनुभएको छ।

युक्रेनमाथिको रुसी आक्रमण पाँचौँ जाडोमा प्रवेश गर्न लागेका बेला उहाँले रुसमाथिका प्रतिबन्ध थप कडा बनाउनुपर्ने सङ्केत गर्नुभएको छ। यही हप्ताको युरोपेली शिखर बैठकअघि यसबारे छलफल गराउन आफू ब्रसेल्स जाने उहाँले बताउनुभएको छ। यता जर्मन चान्सलर फ्रेडरिक मेर्जले अमेरिका र रुसबीच डिजेल निर्यातसम्बन्धी सहमतिलाई जर्मनी र युरोपका लागि अस्वीकार्य भन्नुभएको छ।

गत शुक्रबार ट्रम्प र पुटिनबीच टेलिफोन वार्तापछि डिजेल निर्यातसम्बन्धी प्रतिबन्ध आंशिक रूपमा हटाइएको थियो। मेर्जले जर्मनीले रुसमाथिका प्रतिबन्ध पालना गरिरहेको र युक्रेनलाई सहयोग जारी राख्ने बताउनुभएको छ।