नेपाल प्रत्यायन केन्द्र सुरु, गुणस्तर प्रमाणीकरण अब स्वदेशमै

उद्योग, वाणिज्य तथा आपूर्ति मन्त्रालयअन्तर्गत नेपाल प्रत्यायन केन्द्र सञ्चालनमा आएको छ। काठमाडौँको त्रिपुरेश्वरमा रहेको केन्द्रको बुधबार उद्योग, वाणिज्य तथा आपूर्ति मन्त्री इन्जिनियर दीपककुमार साहले उद्घाटन गर्नुभएको छ। नेपाली उद्योगलाई प्रतिस्पर्धी बनाउन, उपभोक्तालाई गुणस्तरीय र सुरक्षित वस्तु तथा सेवाको सुनिश्चितता दिन र नेपाली उत्पादनलाई अन्तर्राष्ट्रिय बजारमा पुर्‍याउन केन्द्र खोलिएको मन्त्रालयले जनाएको छ।

अब प्रयोगशाला, मेडिकल ल्याब, निरीक्षण निकाय तथा प्रमाणीकरण संस्थाले प्रत्यायन सेवा नेपालमै लिन सक्ने आधार बनेको छ। मन्त्रालयका अनुसार यसले उद्योगी र व्यवसायीको परीक्षण तथा प्रमाणीकरणमा लाग्ने समय र खर्च घटाउनुका साथै गुणस्तर सुधार्न सघाउनेछ। सरकारले यो केन्द्रलाई औद्योगिक विकास र व्यापार सहजीकरणतर्फको महत्त्वपूर्ण कदम मानेको छ।

मन्त्री साहले यस केन्द्रले उद्योगको खर्च कम गर्न, उपभोक्ताको भरोसा बढाउन र नेपाली वस्तुलाई संसारको बजारसम्म पुर्‍याउन कोसेढुङ्गाको काम गर्ने विश्वास व्यक्त गर्नुभएको छ।