नेपथ्यको इटहरी कन्सर्टमा १० हजारभन्दा बढी दर्शक, गान्तोकमा पनि भव्य साँझ

लोकरक ब्यान्ड नेपथ्यले पहिलोपटक इटहरी रङ्गशालामा प्रत्यक्ष प्रस्तुति दिएको छ। पूर्वाञ्चल इभेन्ट्स प्रालिको आयोजना र इटहरी उपमहानगरपालिकाको प्रवर्द्धनमा भएको ‘नेपथ्य इन कन्सर्ट २०२६’ मा पूर्वी नेपालका विभिन्न जिल्लाबाट सङ्गीतप्रेमी पुगेका थिए। करिब १० हजार दर्शक अटाउने गरी तयार पारिएको रङ्गशालामा अपेक्षाभन्दा बढी भीड जम्मा भएको थियो।

मुख्य गायक अमृत गुरुङले तिहारको तयारी र धान काट्ने याम सम्झाउँदै ‘नमस्ते इटहरी, नमस्ते कोशी प्रदेश’ भनेर दर्शकलाई अभिवादन गर्नुभएको थियो। ३५ वर्षदेखि दर्शकको माया पाउँदै आएको ब्यान्डले पहिलोपटक इटहरीमा गाउन पाउँदा खुसी लागेको उहाँले बताउनुभएको थियो। ब्यान्डले ‘छेक्यो छेक्यो’, ‘जोमसोमे बजारमा’, ‘रेशम’, ‘सुन सुन साइँली’ र ‘कर्णाली’ लगायत गीत प्रस्तुत गरेको थियो।

यसअघि आइतबार राति भारतको सिक्किमस्थित गान्तोकको पाल्जोर रङ्गशालामा पनि नेपथ्यको कन्सर्ट भएको छ। शनिबार हुने गरी महिनौँअघि तय गरिएको उक्त कार्यक्रम आइतबार राति भएको थियो। भित्र प्रस्तुति चलिरहँदा बाहिरका ढोकामा प्रवेश खोज्ने दर्शकको पनि उत्तिकै भीड थियो।

भीड नियन्त्रणका लागि आसपासका सडकमा सवारी रोकेर ठूलो सङ्ख्यामा सुरक्षाकर्मी खटाइएको थियो। गान्तोकका बासिन्दाले उक्त कन्सर्टलाई ऐतिहासिक भनेका छन्।