ग्रिनल्यान्ड संसद्ले अमेरिकी सैन्य उपस्थिति बढाउने सुरक्षा सम्झौता अनुमोदन गर्‍यो

ग्रिनल्याण्डको संसद्ले अमेरिका र डेनमार्कसँग गरिएको सुरक्षा सम्झौतालाई अनुमोदन गरेको छ। आर्कटिक क्षेत्रमा रणनीतिक महत्त्व बोकेको यस टापुमा अमेरिकी सेनाको उपस्थिति बढाउने र सुरक्षा सहकार्य फराकिलो बनाउने उद्देश्यले यो सम्झौता गरिएको हो। ग्रिनल्याण्डका प्रधानमन्त्री जेन्स फ्रेडरिक निल्सन, डेनमार्ककी प्रधानमन्त्री मेटे फ्रेडरिक्सन र अमेरिकी राष्ट्रपति डोनाल्ड ट्रम्पले गत सेप्टेम्बर २२ मा यसमा हस्ताक्षर गरेका थिए।

सम्झौताले ग्रिनल्याण्डमाथि डेनमार्कको सार्वभौमसत्ता र स्थानीय जनताको आत्मनिर्णयको अधिकारलाई पनि दोहोर्‍याएर स्वीकार गरेको छ। मङ्गलबार भएको मतदानमा सम्झौताको विरोधमा एउटा पनि मत परेन, तर केही सांसद मतदानमा सहभागी भएनन्। अघिल्लो महिनाको प्रारम्भिक छलफलमै अधिकांश सांसदले समर्थनको सङ्केत दिइसकेका थिए।

विदेशमन्त्री मुट इगेडले विश्व परिस्थिति झन् अनिश्चित बनिरहेका बेला टापुको सुरक्षा र भविष्य जोगाउन यो अनुमोदन अहम् कदम भएको बताएका छन्। ग्रिनल्याण्ड र डेनमार्क दुवैको संसदीय प्रक्रिया पूरा भएपछि मात्र सम्झौता कार्यान्वयनमा आउनेछ। डेनमार्कको संसद्मा नोभेम्बर ११ मा सम्बन्धित विधेयकमाथि पहिलो छलफल हुने तालिका छ।

दोस्रो छलफलपछि नोभेम्बर १९ मा त्यहाँ अन्तिम मतदान गरिने कार्यतालिका तय भएको छ।