विरोधपछि बङ्गलादेशमा गार्मेन्ट कामदारको तलब बढाउन सहमति

बङ्गलादेशको गार्मेन्ट उद्योगमा ५ दिनदेखि चलेको विरोधपछि कामदारको न्यूनतम तलब बढाउने विषयमा सहमति बनेको ज्याला बोर्डले बुधबार जनाएको छ। गत शनिबारदेखि हजारौँ कामदार तलब वृद्धिको माग गर्दै सडकमा उत्रिएका थिए। प्रदर्शनका क्रममा केहीले सडक अवरुद्ध गर्दै इँटा प्रहार गरेपछि प्रहरीले अश्रुग्यास प्रयोग गरेको थियो।

कामदारहरूले हालको करिब साढे १२ हजार टाका मासिक न्यूनतम तलबलाई ३० हजार टाका पुर्‍याउन माग गरेका छन्। बोर्डमा कामदारका प्रतिनिधि बाबुल अख्तरले डिसेम्बरभित्रै निर्णय भए जनवरीदेखि नयाँ तलब पाउन सकिने बताएका छन्। कारखाना मालिकका प्रतिनिधि पनि यसमा सहमत भएको उनको भनाइ छ।

गार्मेन्ट उत्पादक तथा निर्यातकर्ता सङ्घ बीजीएमईएका प्रतिनिधि एबीएम शम्सुद्दिनले बोर्डले डिसेम्बरभित्रै आफ्नो काम सक्ने बताएका छन्। तर तलब कति बढाउने भन्ने टुङ्गो अझै लागेको छैन। सरकारले रोजगारदाता र कामदार सम्मिलित ज्याला बोर्ड आइतबार गठन गरेको थियो।

करिब ८ प्रतिशतको मुद्रास्फीतिले खाद्यान्न, आवास र यातायात महँगो हुँदा कामदारको क्रयशक्ति घटेको छ। चीनपछि बङ्गलादेश विश्वको दोस्रो ठूलो तयारी पोसाक निर्यातकर्ता हो र यस क्षेत्रमा करिब ४० लाख मानिस कार्यरत छन्। देशको कुल निर्यात आम्दानीको करिब ८० प्रतिशत हिस्सा यही उद्योगले ओगटेको छ।

यस उद्योगको सबैभन्दा ठूलो एकल बजार अमेरिका हो।