आयल निगमको सबै कारोबार एउटै डिजिटल प्रणालीमा, ईआरपी अन्तिम चरणमा

नेपाल आयल निगमले आफ्नो सम्पूर्ण कारोबार एउटै डिजिटल प्रणालीमा जोड्न सुरु गरेको इन्टरप्राइज रिसोर्स प्लानिङ अर्थात् ईआरपी परियोजना अन्तिम चरणमा पुगेको छ। परियोजना प्रमुख प्रदीपकुमार यादवका अनुसार करिब २२ करोड ८७ लाख रुपैयाँको यो परियोजनाको पहिलो चरण लागू भएसँगै इन्धन खरिद, बिक्री, वितरण, भण्डारण, वित्त, लेखा र कर्मचारी व्यवस्थापनका काम डिजिटल प्रणालीबाट हुन थालेका छन्। परामर्शदाता काठमाडौँ विश्वविद्यालयको युनिभर्सिटी कन्सल्टले कात्तिक १७ गते प्रतिवेदन बुझाएपछि निगमले परियोजना समापन र हस्तान्तरणको काम अघि बढाएको छ।

परामर्शदाताको मूल्याङ्कनमा परियोजनाका करिब ८८ प्रतिशत कार्यात्मक आवश्यकता पूरा भएको उल्लेख छ। अब देशभरका १ हजार ५ सयभन्दा बढी डिलर, ६० बोटलर तथा एयरलाइन्स र तिनका एजेन्टले डिपो नपुगी अनलाइनबाटै इन्धन माग गर्न, डिजिटल भुक्तानी गर्न र कारोबार विवरण हेर्न सक्ने भएका छन्। वार्षिक करिब ३ खर्ब रुपैयाँको कारोबार गर्ने निगम पूर्ण रूपमा कागजरहित र पारदर्शी सञ्चालनतर्फ अघि बढिरहेको छ।

निगमले डेटा सेन्टर बनाउने र प्रणालीमा एआई जोड्ने योजना पनि अघि सारेको छ।