गोदावरी फूल प्रदर्शनी सकियो, १ करोड ४६ लाख रुपैयाँको कारोबार

ललितपुरको जावलाखेलमा भएको १९औँ गोदावरी फूल प्रतियोगितात्मक प्रदर्शनी करिब १ करोड ४६ लाख रुपैयाँको कारोबारसहित बुधबार सम्पन्न भएको छ। फ्लोरिकल्चर एसोसिएसन नेपाल अर्थात् फ्यानको आयोजनामा यो प्रदर्शनी कात्तिक १२ गतेदेखि जावलाखेल मैदानमा चलेको थियो। फ्यानका अनुसार अन्तिम दिन मात्र करिब २४ लाख ९० हजार रुपैयाँको कारोबार भएको छ।

सो दिन करिब ६ हजार ५ सय ८१ जनाले प्रदर्शनी अवलोकन गरेका थिए। बुधबारभन्दा अघिल्लो अर्थात् पाँचौँ दिन करिब २१ लाख ५० हजार रुपैयाँको कारोबार भएको एसोसिएसनले जनाएको छ। दर्शक सङ्ख्या भने तेस्रो दिन सबैभन्दा धेरै, करिब १० हजार ७ सय पुगेको थियो।

पहिलो दिन करिब ८ हजार ९ सय र दोस्रो दिन करिब ४ हजार २ सय जनाले प्रदर्शनी हेरेका थिए। चौथो दिन करिब ७ हजार २ सय ५० र पाँचौँ दिन करिब ६ हजार ७ सय ५६ जना दर्शक प्रदर्शनीस्थल पुगेका थिए। मेला अवधिमा मौसम प्रतिकूल भए पनि कारोबार र दर्शकको उपस्थिति अपेक्षाअनुसार नै भएको मेला संयोजक सुमन महर्जनले बताउनुभएको छ।

समापन कार्यक्रममा प्रदर्शनीमा सहभागी पुष्प व्यवसायीहरूलाई आयोजकले प्रमाणपत्र प्रदान गरेको छ।