चितवनका विकट चेपाङ बस्तीमा घुम्ती शिविरबाट नागरिकता वितरण

जिल्ला प्रशासन कार्यालय चितवनले राप्ती नगरपालिकाका विकट चेपाङ बस्तीमा घुम्ती शिविर चलाएर स्थानीयलाई नागरिकता वितरण गरेको छ। प्रशासनका अनुसार करिब ९० जना चेपाङ समुदायका नागरिकले शिविरबाट नागरिकता पाएका छन्। प्रमुख जिल्ला अधिकारी गणेश अर्यालको नेतृत्वमा गएको टोलीले राप्ती–१३ र राप्ती–१२ मा सेवा दिएको हो, जसमध्ये अधिकांश वडा १३ का छन्।

सदरमुकामबाट ती बस्तीसम्म पुग्न करिब दुई–तीन दिन लाग्ने प्रशासनले जनाएको छ। लामो समयदेखि कागजात नहुँदा नागरिकताबाट वञ्चित वृद्धवृद्धा र दृष्टिविहीन नागरिकले पनि शिविरमा नागरिकता पाएका छन्। वर्षायाममा पहिरोको जोखिम हुँदाहुँदै टोली बस्तीसम्म पुगेको थियो।

प्रशासकीय अधिकृत अन्तिम सिंजाली मगरका अनुसार राप्तीका वडा नम्बर १०, ११, १२ र १३ मा शिविर राख्ने तयारी थियो। तर वडा १० र ११ बाट पर्याप्त कागजात नआएपछि दुई वडामा मात्र शिविर सञ्चालन भएको उहाँले बताउनुभएको छ। उहाँका अनुसार करिब १२० जनाको कागजात आएको थियो।

शिविरमै जिल्ला निर्वाचन कार्यालय चितवनका प्रमुख भीमसेन कार्कीको नेतृत्वमा मतदाता परिचयपत्र पनि बनाइएको छ। सेवाग्राही वडा कार्यालयसम्म आउन पनि करिब तीन–चार घण्टा पैदल हिँडेका थिए। उनीहरूलाई शिविरमा खाजाको प्याकेट पनि दिइएको थियो।

राप्ती–१३ का वडाध्यक्ष अशोककुमार प्रजाले आवश्यक कागजात सङ्कलन गरी प्रशासनसँग समन्वय गरेका थिए।