ज्येष्ठ नागरिकको ज्ञान नयाँ पुस्तामा पुर्‍याउन 'अनुभव बैंक' बनाउँदै मन्त्रालय

महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्रालयले ज्येष्ठ नागरिकको जीवनभरको ज्ञान र सीप नयाँ पुस्तालाई सुम्पन 'ज्येष्ठ नागरिक अनुभव बैंक' बनाउने काम सुरु गरेको छ। ३६औँ अन्तर्राष्ट्रिय ज्येष्ठ नागरिक दिवसको अवसरमा मन्त्रालयले यो अवधारणा सार्वजनिक गरेको हो। मन्त्री सीता बादीले ज्येष्ठ नागरिकको सिकाइ देशको बौद्धिक र सामाजिक सम्पदा भएको बताउनुभएको छ।

उहाँका अनुसार डिजिटल प्रविधि प्रयोग गरेर ती अनुभवको संरक्षण, अभिलेख र पुस्तान्तरणलाई संस्थागत गरिनेछ। मन्त्री बादीले ज्येष्ठ नागरिकलाई हेरचाह मात्र चाहिने समूहका रूपमा नभई समाजका सक्रिय र सम्मानित साझेदारका रूपमा हेर्नुपर्ने धारणा राख्नुभएको छ। मन्त्रालयले कृषि, उद्यम, पेसा, शिक्षा, प्रशासन, कला–संस्कृति, सामाजिक जीवन र परम्परागत ज्ञानलगायत क्षेत्रमा ज्येष्ठ नागरिकले कमाएको अनुभव सङ्कलन गर्ने योजना बनाएको छ।

अन्तरपुस्ता ज्ञान हस्तान्तरण बैंकको मुख्य आधार हुनेछ। दशकौँको अभ्यासबाट आर्जित ज्ञान उहाँहरूसँगै हराउन नदिनु बैंकको प्रमुख उद्देश्य रहेको मन्त्रालयले जनाएको छ। अभिलेख तयार भएपछि विद्यार्थी र युवाले त्यस्तो ज्ञानबाट मार्गदर्शन लिन सक्ने आधार बन्ने मन्त्रालयको भनाइ छ।

सामाजिक सुरक्षा, स्वास्थ्य र हेरचाहसँगै ज्येष्ठ नागरिकको अनुभवलाई समाजकै काममा लगाउने यसको मूल सोच रहेको छ। मन्त्रालयले अनुभव बैंकलाई चरणबद्ध रूपमा विस्तार गर्दै लैजाने जनाएको छ।