एमटिभी भिएमएमा 'सङ अफ द इयर' जित्ने पहिलो के–पप समूह बन्यो बीटीएस

दक्षिण कोरियाली सांगीतिक समूह बीटीएस अमेरिकी एमटिभी भिडियो म्युजिक अवार्ड, भिएमएमा 'सङ अफ द इयर' जित्ने पहिलो के–पप समूह बनेको छ। सेप्टेम्बर २७ मा लस एन्जलसको पिकक थिएटरमा भएको समारोहमा समूहले 'स्विम' गीतका लागि यो अवार्ड पाएको हो। सोही गीतले 'बेस्ट के–पप' अवार्ड पनि जितेको छ भने समूहले 'बेस्ट ग्रुप' को अवार्डसमेत हात पारेको छ।

बीटीएसले यस वर्ष मनोनयन भएका तीनवटै विधामा जित निकालेको छ। 'बेस्ट ग्रुप' मा यो समूहको पाँचौँ जित हो, यसअघि सन् २०१९ देखि २०२२ सम्म लगातार चार पटक यो अवार्ड जितेको थियो। 'सङ अफ द इयर' विधामा बीटीएसले म्याडोना, साब्रिना कार्पेन्टर, ओलिभिया डिन र जारा लार्सनलगायतका कलाकारका गीतलाई पछि पारेको छ।

सन् २०२१ मा 'डाइनामाइट' का लागि यही विधामा मनोनयन पाउने पहिलो कोरियाली कलाकार बने पनि बीटीएसले त्यतिबेला अवार्ड जित्न सकेको थिएन। गत वर्ष ब्ल्याकपिंककी रोसेले ब्रुनो मार्ससँगको 'एपीटी.' गीतका लागि यो अवार्ड जितेकी थिइन्। जिन, भी, जे–होप, सुगा, जिमिन, जङकुक र आरएम सम्मिलित यो समूहले एजेन्सी बिगहिट म्युजिकमार्फत प्रशंसक समूह आर्मीप्रति आभार व्यक्त गरेको छ।