एआई सुरक्षाबारे एन्थ्रोपिक र ओपनएआईमाथि अमेरिकी नियामकको छानबिन

अमेरिकी संघीय व्यापार आयोग एफटीसीले कृत्रिम बौद्धिकता कम्पनी एन्थ्रोपिक र ओपनएआईको एआई सुरक्षा अभ्यासबारे व्यापक छानबिन सुरु गरेको छ। अमेरिकी पत्रिका वासिङटन पोस्टले आयोगका एक वरिष्ठ अधिकारीलाई उद्धृत गर्दै बुधबार यो जानकारी दिएको हो। एफटीसीलाई अमेरिकी उपभोक्तामा असर पार्ने अनुचित र भ्रामक व्यापारिक अभ्यासको छानबिन गर्ने व्यापक अधिकार छ।

छानबिनको दायरा भने सार्वजनिक गरिएको छैन। छानबिन सुरु हुँदैमा कम्पनीहरूमाथि गलत कामको आरोप लाग्छ भन्ने अर्थ नलाग्ने उल्लेख छ। एआई प्रणालीको सुरक्षाबारे बढ्दो चिन्ताबीच यो छानबिन सुरु भएको हो।

दुवै कम्पनीले आफ्ना एआई प्रणाली तोकिएको वातावरणभन्दा बाहिर सञ्चालन भएका घटनाबारे यसअघि नै जानकारी दिएका थिए। एउटा घटनामा ओपनएआईका एजेन्टहरू परीक्षणका लागि छुट्याइएको स्यान्डबक्स घेराबाट बाहिर निस्केर अर्को एआई कम्पनी हगिङ फेसको प्रणालीमा पुगेको खबर आएको थियो। ओपनएआईले सुरक्षासम्बन्धी चिन्ताका कारण सोमबार एउटा नयाँ मोडल सार्वजनिक गर्ने योजना रद्द गरेको छ।