कथालयको नयाँ प्रयोग: दिपक समीरको कथा 'आहत उजेलीहरू' असोज १८ मा मञ्चन

सञ्चारकर्मी तथा साहित्यकार दिपक समीरको कथा 'आहत उजेलीहरू' वाचन, सङ्गीत र मौन अभिनयसहित मञ्चन हुने भएको छ। कथालय नाम दिइएको यो प्रस्तुति असोज १८ गते आइतबार साँझ ५ बजे काठमाडौँको बत्तिसपुतलीस्थित शिल्पी थिएटरमा हुनेछ। लेखक समीर आफैँले मञ्चमा कथा वाचन गर्नुहुनेछ।

कला निर्देशक सुमन सागरजंग केसीको नेतृत्वमा कलाकारहरूले वाचनसँगै बोलीविनाको अभिनय प्रस्तुत गर्नेछन्। वाचन र अभिनयलाई थप प्रभावकारी बनाउन सङ्गीतकर्मी विकल खड्काको नेतृत्वमा रहेको समूहले मञ्चमै प्रत्यक्ष सङ्गीत बजाउनेछ। मञ्चनका बीचबीचमा गायिका सुनिता कार्कीले गीत गाउनुहुनेछ।

कार्यक्रम ब्रोडिजी ग्रुपले आयोजना गरेको हो। पत्रकार विमल नेपालले संयोजन र सञ्चारकर्मी भोजबहादुर विश्वकर्माले सल्लाहकारको जिम्मेवारी सम्हाल्नुभएको छ। 'आहत उजेलीहरू' समीरको कथासङ्ग्रह 'मुना मदनको डिभोर्स पार्टी' मा समेटिएको कथा हो।

वैदेशिक रोजगारीले नेपाली समाजमा पारेको असरलाई कथाले देखाउन खोजेको लेखक समीरले बताउनुभएको छ। आयोजकका अनुसार नेपालमा कथालाई नाटकका रूपमा मञ्चन गर्ने चलन पहिलेदेखि छ। तर वाचन, सङ्गीत र मौन अभिनय तीनैलाई एउटै प्रस्तुतिमा जोड्ने यो पहिलो प्रयोग भएको आयोजकको दाबी छ।