छुट्टै उत्पादन सुविधा नभएका ४७ प्रकारका औषधिको उत्पादन अनुमति खारेज

औषधि व्यवस्था विभागले छुट्टै उत्पादन सुविधा नभएका प्रतिरक्षा प्रणाली दबाउने ४७ प्रकारका औषधिको उत्पादन, बिक्री-वितरण र आयात अनुमति खारेज गरेको छ। विभागका अनुसार असोज २० गते महानिर्देशकस्तरबाट निर्णय गरी ती औषधिका उत्पादन अनुज्ञापत्र, बिक्री-वितरण तथा पैठारी दर्ता प्रमाणपत्र र पैठारी सिफारिसपत्र रद्द गरिएका हुन्। जोखिम मूल्याङ्कनसम्बन्धी यसअघिको सूचनाको म्याद सकिएपछि यो कदम चालिएको विभागले जनाएको छ।

औषधिको गुणस्तर र सुरक्षा सुनिश्चित गर्न तथा एउटा औषधिबाट अर्कोमा दूषण सर्ने जोखिम घटाउन यो निर्णय गरिएको विभागको भनाइ छ। खारेज भएका औषधिमा टोफासिटिनिब, लेफ्लुनोमाइड, माइकोफेनोलेट मोफेटिल र ट्याक्रोलिमसलगायत पर्छन् र तिनका ब्रान्ड स्वदेशी तथा विदेशी दुवै उत्पादकसँग सम्बन्धित छन्। सूचीमा लेफ्रोन, इमुलेफ, लेफ्लु, रुलेफ, लिफट्याव र टाकफालगायतका ब्रान्ड परेका छन्।