दसैँ किनमेल: असन–न्युरोडमा घुइँचो, दरबारमार्ग र मलमा भने सुस्त व्यापार

दसैँ नजिकिँदै गर्दा काठमाडौँका प्रमुख बजारमा किनमेलको फरक-फरक दृश्य देखिएको छ। असन र न्युरोडमा नयाँ लुगा, जुत्ता, खाद्यान्न, मसला र पूजासामग्री किन्न आउनेको भीड बढेको छ। परिवारका लागि नयाँ लत्ताकपडा किन्ने परम्पराले गर्दा पुरानो व्यापारिक केन्द्र असनमा हरेक दसैँमा चहलपहल बढ्ने गरेको छ।

ब्रान्डेड सामानका लागि चिनिने दरबारमार्गमा भने कपडा, जुत्ता र झोलामा छुट दिइए पनि अपेक्षित कारोबार नभएको व्यापारीहरूले बताएका छन्। पसलमा ग्राहक आए पनि सोहीअनुसार बिक्री नभएको उनीहरूको अनुभव छ। चाडलाई लक्षित गरी व्यापारीहरूले पसल सजाएका, नयाँ सामान भित्र्याएका र विशेष अफर चलाएका छन्।

सपिङ मलहरूमा पनि मानिसको आवतजावत भए पनि सामान किन्ने ग्राहक घटेको व्यवसायीहरूले बताएका छन्। सिभिल मल, काठमाडौँ मल, युनाइटेड वर्ल्ड ट्रेड सेन्टर, लबिम मल, सिटी सेन्टर र पिपुल्स प्लाजाजस्ता मल कुनै बेला ग्राहकको पहिलो रोजाइमा पर्थे। उपत्यकाका धेरै ठाउँमा नयाँ मल र पसल खुलेपछि ग्राहकले टाढा जानु नपर्ने भएको छ र त्यसको असर पुराना मलमा परेको छ।

मलभित्रका फिल्म हल, रेस्टुरेन्ट र फुड स्टलमा भीड देखिए पनि कपडा पसलको कारोबार कमजोर छ।