रुसी डिजेलमा अमेरिकी छुटपछि जर्मनी र बेलायतद्वारा रुसमाथि थप प्रतिबन्धको माग

अमेरिकी राष्ट्रपति डोनाल्ड ट्रम्पले रुसी डिजेलमाथिको प्रतिबन्ध खुकुलो पारेपछि जर्मनी र बेलायतका विदेशमन्त्रीले मस्कोमाथि थप कडा प्रतिबन्ध लगाउनुपर्नेमा जोड दिनुभएको छ। पोल्यान्डको राजधानीमा आयोजित वार्सा सुरक्षा मञ्चमा जर्मन विदेशमन्त्री जोहान वाडेफुलले प्रतिबन्ध खुकुलो पार्ने होइन, झन् कडा बनाउनुपर्ने बताउनुभएको छ। युरोपले अमेरिकालाई पनि रुसमाथि दबाब बढाउन आग्रह गरिरहेको उहाँको भनाइ छ।

रुसले अमेरिकालाई डिजेल आपूर्ति गर्ने सम्झौताअन्तर्गत गत साता गरिएको उक्त निर्णयले युक्रेन र उसका युरोपेली समर्थक निराश भएका छन्। यसैबीच युरोपेली सङ्घले सोमबार करिब १ हजार ६०० रुसी व्यक्ति तथा संस्थालाई आफ्नो प्रतिबन्ध सूचीमा थपेको छ। ट्रम्पले शुक्रबार पुटिनसँगको कुराकानीपछि रुसले विश्व बजारमा ठूलो परिमाणमा डिजेल उपलब्ध गराउने घोषणा गर्नुभएको थियो।

फेब्रुअरी २८ मा इरानविरुद्ध युद्ध सुरु भएयता बढेको इन्धनको मूल्य नियन्त्रण गर्न यो कदम चालिएको हो। तर ईयूका अर्थ मामिला प्रमुख भल्डिस डोम्ब्रोभ्स्किसले बैंककमा जारी अन्तर्राष्ट्रिय मुद्रा कोष र विश्व बैंकको वार्षिक बैठकका क्रममा रुसी डिजेलले विश्व बजारमा इन्धनको मूल्य खासै नघटाउने बताउनुभएको छ। उहाँका अनुसार रुसले निर्यात गर्ने भनिएको डिजेलको मात्रा विश्व अर्थतन्त्रलाई खासै असर गर्ने खालको छैन।