लद्दाखका स्थानको नामकरणमा भारतको कदमप्रति चीनको कडा आपत्ति

भारतले लद्दाखका २८ स्थानको मानक नाम तोकेर आधिकारिक नक्सामा राख्ने निर्णय गरेपछि चीनले त्यसलाई अवैध र अमान्य भन्दै कडा आपत्ति जनाएको छ। चिनियाँ विदेश मन्त्रालयकी प्रवक्ता माओ निङले मंगलबार यसबारे सोधिएको प्रश्नको जवाफ दिँदै भारतको कदमले भूभागमाथिको चीनको दाबी नबदलिने बताउनुभएको छ। उहाँका अनुसार चीन–भारत सीमाको पश्चिमी क्षेत्रका सम्बन्धित भूभाग सधैँ चीनकै हुन्।

भारतले एकतर्फी रूपमा गठन गरेको केन्द्र शासित प्रदेश लद्दाखलाई चीनले कहिल्यै मान्यता नदिएको पनि उहाँले स्पष्ट पार्नुभएको छ। चिनियाँ पक्षका अनुसार भारतको गृह मन्त्रालयले घोषणा गरेका नाममा विवादित सीमा क्षेत्र र चीनको वास्तविक नियन्त्रणमा रहेका केही ठाउँ पनि परेका छन्। भारतले अक्टोबर २ मा सार्वजनिक गरेको नामावलीमा गोगरा र हट स्प्रिङ्सजस्ता संवेदनशील क्षेत्र समेटिएका छन्, जहाँ सन् २०२० मा दुई देशका सेनाबीच तनाव बढेको थियो।

भारतीय विदेश मन्त्रालयका प्रवक्ता रणधीर जयसवालले लद्दाख भारतको अभिन्न तथा अविभाज्य भूभाग रहेको र चीनको अस्वीकारले यो तथ्य नबदलिने प्रतिक्रिया दिनुभएको छ। लद्दाख प्रशासन र स्थानीय बासिन्दासँग परामर्श गरेर नाम तय गरिएको र आधिकारिक नक्सामा ती ठाउँको सही पहिचान कायम गर्नु यसको उद्देश्य रहेको उहाँले जनाउनुभएको छ।