७१औँ प्रहरी दिवस: धनकुटा र चितवनमा रक्तदान कार्यक्रम

७१औँ प्रहरी दिवसका अवसरमा धनकुटा र चितवनमा मंगलबार रक्तदान कार्यक्रम आयोजना गरिएको छ। धनकुटामा जिल्ला प्रहरी कार्यालयको प्राङ्गणमा बिपी कोइराला स्वास्थ्य विज्ञान प्रतिष्ठानको रक्तसञ्चार शाखासँगको सहकार्यमा २० जनाले रगत दिएका छन्। प्रहरी नायब उपरीक्षक हेमन्त भण्डारी क्षेत्रीले ब्लड ब्याग हस्तान्तरण गरेर कार्यक्रम उद्घाटन गर्नुभएको थियो।

सङ्कलित रगत धनकुटाको रक्तसञ्चार केन्द्रमा राखिने जनाइएको छ। चितवनमा नेपाल पुलिस स्कुल शान्तिपुरले दिवसको सङ्ख्या बराबर ७१ जना रक्तदाता जुटाएको छ। जिल्ला प्रहरी कार्यालय चितवन र नेपाल रेडक्रस सोसाइटीको स्थानीय शाखासँगको समन्वयमा भएको कार्यक्रममा अभिभावक, शिक्षक, प्रहरी कर्मचारी र स्थानीय संघसंस्थाका प्रतिनिधिले रक्तदान गरेका हुन्।

सोही अवसरमा प्रहरी–नागरिक साझेदारी संस्थामा संरक्षित ३० बालबालिकालाई शैक्षिक सामग्री वितरण गरिएको छ। ती बालबालिकाको निःशुल्क स्वास्थ्य तथा रक्त परीक्षण पनि गरिएको थियो। जाँचमा चितवन एभरेष्ट हस्पिटल र सगरमाथा ल्याबले प्राविधिक सहयोग गरेका थिए।

यस वर्षको प्रहरी दिवस 'विपद्मा सारथी, सङ्कटमा छहरी, प्रविधियुक्त नेपाल प्रहरी' भन्ने मूल नारासहित मनाइएको छ।