समस्याग्रस्त १२ सहकारीका थप २३५ बचतकर्ताले रकम फिर्ता पाए

समस्याग्रस्त सहकारी व्यवस्थापन समितिले १२ वटा समस्याग्रस्त सहकारीका थप २३५ बचतकर्तालाई उनीहरूको बचत रकम फिर्ता दिएको छ। यस चरणमा थोरै रकम बचत गरेका साना बचतकर्तालाई प्राथमिकता दिइएको समितिले जनाएको छ। भुक्तानीका लागि ती सहकारीबाट उठाइएको ऋण र सम्पत्ति व्यवस्थापनबाट जुटेको रकम नै प्रयोग गरिएको सरकारले स्पष्ट पारेको छ।

समितिको विवरणअनुसार सबैभन्दा धेरै कान्तिपुर सहकारीका ८० जनाले रकम पाएका छन्। शिव शिखर सहकारीका ६२ जना र ओरेन्टल सहकारीका ३७ जना बचतकर्ता पनि लाभान्वित भएका छन्। नेपाल वित्तीय सहकारीका १२, गोरखा सहकारीका ११ र तपाईँ हाम्रो सहकारीका १० जनाले बचत फिर्ता पाएका छन्।

आईडियल यमुना सहकारीका ६ जना तथा कृषि विकास र पशुपति सहकारीका ४/४ जना पनि सूचीमा परेका छन्। बाँकी बचतकर्तालाई पनि बचत रकमको आकारअनुसार समूहमा छुट्याएर क्रमशः भुक्तानी गरिने समितिले उल्लेख गरेको छ। सम्बन्धित सहकारीकै बचतकर्तालाई रकम फिर्ता गर्ने काम प्रचलित कानुनअनुसार निरन्तर चलिरहेको समितिको भनाइ छ।