नेप्से लगातार चौथो दिन बढ्यो, कारोबार रकममा पनि वृद्धि

नेपाल स्टक एक्सचेन्जको परिसूचक नेप्से लगातार चौथो कारोबार दिन बढेर बन्द भएको छ। साताको दोस्रो कारोबार दिन मङ्गलबार नेप्से करिब ४ अंक बढेर झन्डै २ हजार ६०० विन्दुमा पुगेको छ। सोमबार पनि परिसूचक करिब ४ अंकले नै बढेको थियो।

परिसूचकसँगै कारोबार रकम पनि बढेको छ। सोमबार करिब ४ अर्ब ४६ करोड रुपैयाँको सेयर किनबेच भएकोमा मङ्गलबार करिब ३५० कम्पनीको झन्डै १ करोड ३५ लाख कित्ता सेयर करिब ४ अर्ब ७४ करोड रुपैयाँमा कारोबार भएको छ। बैंक, विकास बैंक, लगानी र बीमा समूहका उपसूचक बढेका छन् भने बाँकी समूहका घटेका छन्।

जीवन बीमा उपसमूह करिब पौने २ प्रतिशत उक्लिएको छ। परिसूचक बढे पनि करिब एक सय कम्पनीको सेयर बढ्दा करिब १७० कम्पनीको मूल्य घटेको छ। सगरमाथा जलविद्युत्को सेयरमूल्य करिब साढे १२ प्रतिशत बढेको छ।

स्नो रिभर्सको सेयर भने करिब १५ प्रतिशत घटेको छ। घलेम्दी हाइड्रोको करिब ३६ करोड ५० लाख रुपैयाँको कारोबार भएको छ। माउन्टेन इनर्जी र कुमारी बैंकको कारोबार पनि २५ करोड रुपैयाँभन्दा बढी भएको छ।