बाढी प्रभावित ऋणीलाई राहत : किस्ता तिर्ने म्याद पुस मसान्तसम्म थप

नेपाल राष्ट्र बैंकले भोटेकोशी र बुढीगण्डकी नदीमा आएको बाढीबाट प्रभावित ऋणीलाई सावाँ–ब्याजको किस्ता बुझाउने समय थप गरेको छ। बाढीबाट प्रभावित उद्यम, व्यवसाय तथा ऋणीले अब आगामी पुस मसान्तसम्म किस्ता बुझाउन पाउनेछन्।

राष्ट्र बैंकले मंगलबार बैंक तथा वित्तीय संस्थाहरूलाई सर्कुलर जारी गर्दै यो व्यवस्था गरेको हो। बैंक तथा वित्तीय संस्थाहरूलाई जारी गरिएको एकीकृत निर्देशनमार्फत बाढी प्रभावित ऋणीलाई यो सहुलियत दिइएको हो।

यो व्यवस्थाअनुसार बाढीमा क्षति बेहोरेका व्यवसायीले सावाँ र ब्याज भुक्तानी गर्न थप तीन महिना समय पाएका छन्। तोकिएको समयभित्र किस्ता बुझाउन नसकेका प्रभावित ऋणीलाई यसले राहत पुग्ने गरी समयावधि थपिएको हो।

भोटेकोशी र बुढीगण्डकी नदीमा आएको बाढीका कारण विभिन्न उद्यम, व्यवसाय र ऋणी प्रभावित भएका थिए। राष्ट्र बैंकको निर्देशनअनुसार बैंक तथा वित्तीय संस्थाहरूले प्रभावित ऋणीलाई यो सुविधा उपलब्ध गराउनुपर्नेछ।