महाधिवेशनअघि कमल थापासहित राप्रपाका तीन नेता जिल्ला भ्रमणमा

राष्ट्रिय प्रजातन्त्र पार्टी, राप्रपाका तीन शीर्ष नेता केन्द्रीय महाधिवेशनअघि जिल्ला भ्रमणमा निस्कने भएका छन्। पार्टीका पूर्वअध्यक्षहरू कमल थापा र प्रकाशचन्द्र लोहनी तथा वरिष्ठ उपाध्यक्ष विक्रम पाण्डे भ्रमणमा जान लाग्नुभएको हो। भ्रमण कात्तिक ११ गते पर्साको वीरगञ्जबाट सुरु हुनेछ।

त्यसपछि नेताहरू क्रमशः बारा, रौतहट, सर्लाही, महोत्तरी, धनुषा, सिराहा, सप्तरी, सुनसरी र मोरङ पुग्नुहुनेछ। कात्तिक १६ गते झापामा हुने कार्यक्रमसँगै भ्रमण टुङ्गिनेछ। भ्रमणले मधेश र कोशी प्रदेशका जिल्ला समेट्नेछ।

नेता थापाका अनुसार भ्रमणको मुख्य उद्देश्य पार्टी सङ्गठनलाई बलियो बनाउनु हो। नजिकिँदै गरेको स्थानीय तह निर्वाचन र अहिलेको राजनीतिक परिस्थितिबारे पनि नेता-कार्यकर्तासँग विस्तृत छलफल हुनेछ। हरेक जिल्लामा पार्टीका स्थानीय नेता तथा कार्यकर्तासँग भेटघाट राखिएको छ।

भ्रमणको तालिका सार्वजनिक गर्दै नेता थापाले सम्बन्धित जिल्लाका नेता-कार्यकर्तालाई छलफलमा उपस्थित हुन आग्रह गर्नुभएको छ। राप्रपाको केन्द्रीय महाधिवेशन मङ्सिरमा हुने तय भएको छ।