एनपीएल प्रसारण: नेटटीभीमा अवरोध, ओटीटी शुल्कमा गुनासो, अनधिकृत प्रदर्शनमा क्यानको चेतावनी

एनपीएलको तेस्रो संस्करण सुरु भएसँगै यसको प्रसारणबारे दर्शकको गुनासो र आयोजकको चेतावनी दुवै आएका छन्। नेपालभित्र टेलिभिजनतर्फ हिमालय स्पोर्ट्स र ओटीटीतर्फ नेटटीभीलाई मात्र विशेष प्रसारण अधिकार रहेको नेपाल क्रिकेट संघ, क्यानले जनाएको छ। हिमालय स्पोर्ट्समा खेल निःशुल्क हेर्न पाइन्छ भने मोबाइल र कम्प्युटरमा हेर्न सिजन पासबापत ४०० रुपैयाँ तिर्नुपर्छ।

विदेशमा रहेका दर्शकबाट ४ देखि १० अमेरिकी डलरसम्म शुल्क लिइएको छ। उद्घाटन खेलका बेला नेटटीभीको एप र वेबसाइटमा भिडियो बफर हुने र लोड नहुने समस्या देखिएपछि शुल्क तिरेका दर्शकले आक्रोश पोखेका छन्। यसैबीच क्यानले सार्वजनिक सूचना जारी गर्दै फ्यान पार्क, सार्वजनिक प्रदर्शन र प्रवर्द्धनात्मक कार्यक्रममा आधिकारिक फिड मात्र प्रयोग गर्न निर्देशन दिएको छ।

अनधिकृत फिडबाट खेल देखाए वा पुनर्प्रसारण गरे कानुनी प्रक्रिया अघि बढाइने चेतावनी पनि क्यानले दिएको छ। क्यानले सबै फ्रेन्चाइज टोली, खेलस्थल, कार्यक्रम आयोजक, प्रायोजक र साझेदारलाई प्रतियोगिताभर यो व्यवस्था पालना गर्न भनेको छ। अर्कोतर्फ डिसहोमले सक्रिय डीटीएच र आईपीटीभी ग्राहकले अतिरिक्त शुल्कबिना हिमालय स्पोर्ट्स र स्टार स्पोर्ट्स सेलेक्टका दुई च्यानलमा खेल एचडीमा हेर्न सक्ने जनाएको छ।

दुई खेल हुने दिन प्रसारण दिउँसो साढे १२ बजे र साँझ ५ बजेदेखि हुनेछ।