जाजरकोट, डोल्पा र गोरखाबाट जटिल प्रसूति भएका महिलाको हवाई उद्धार

जाजरकोटको कुशे गाउँपालिका–२ की १७ वर्षीया किशोरीमा प्रसूतिको जटिलता देखिएपछि नेपाली सेनाको हेलिकप्टरबाट सुर्खेत पुर्‍याइएको छ। महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्रालयले गर्भवती र सुत्केरीका लागि चलाएको हवाई उद्धार कार्यक्रमअन्तर्गत उनलाई सारिएको हो। यो कार्यक्रम राष्ट्रिय महिला सशक्तीकरण परियोजनाअन्तर्गत सञ्चालनमा छ।

विकट भूगोल, स्थानीय स्वास्थ्य संस्थामा सीमित सेवा र ढिलाइका कारण जोखिममा पर्ने महिलालाई समयमै विशेषज्ञ सेवासम्म पुर्‍याउने लक्ष्यले मन्त्रालयले यो कार्यक्रम चलाउँदै आएको छ। यसैगरी, डोल्पाको शे–फोक्सुण्डो गाउँपालिका–४ नाम्दोकी २८ वर्षीया एक महिलालाई पनि सोमबार हवाई उद्धार गरी सुर्खेत ल्याइएको छ। गर्भावस्थामा साल अड्किएपछि उनको अवस्था जटिल बनेको थियो।

गोरखाको धार्चे गाउँपालिका–३ उहियाबाट २१ वर्षीया एक गर्भवतीलाई नेपाल रेडक्रसले हेलिकप्टरमार्फत गोरखा सदरमुकामको प्रदेश अस्पताल पुर्‍याएको छ। राहत बाँड्न पुगेको रेडक्रस टोलीलाई स्थानीयले खबर गरेपछि उनलाई श्रीमान् र एक आफन्तसहित उद्धार गरिएको हो। उक्त टोलीले असोज ३१ गते घर फर्कन नसकेका दुई भेडा गोठालालाई पनि हेलिकप्टरबाट उद्धार गरेको थियो।

बुढीगण्डकीको बाढीले घर, सडक र बिजुलीमा क्षति पुर्‍याउँदा स्थानीयको जनजीवन कष्टकर बनेको रेडक्रस गोरखा शाखाका सभापति भीमसेनकाजी बानियाँले बताउनुभएको छ।